Memlekettik eńbek ınspektorlary 24 myńnan astam jumyskerdiń quqyǵyn qorǵady
ASTANA. KAZINFORM – 2024 jylǵy 1 maýsymdaǵy jaǵdaı boıynsha memlekettik eńbek ınspektorlary respýblıkanyń 145 kásiporny 10,6 myń jumyskerge 1,6 mlrd teńgeden astam somaǵa jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda 4,2 myńǵa jýyq eńbek quqyǵynyń buzylýy anyqtaldy. Bul týraly QR Eńbek jáne halyqty áleýmettik qorǵaý mınıstrligi málim etti.
«Jalaqy boıynsha bereshegi bar kásiporyndardyń basshylaryna oryndaýǵa mindetti 139 uıǵarym berildi jáne 17,7 mln teńgeden astam somaǵa aıyppul salyndy. Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 8,9 myńnan astam jumyskerdiń quqyǵy qorǵaldy. Olarǵa 895,6 mln teńge tólendi», — delingen habarlamada.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.
2024 jylǵy 1 maýsymdaǵy derekter boıynsha memlekettik eńbek ınspektorlary 2 954 tekserý júrgizdi, onyń barysynda 4 197 buzýshylyq anyqtaldy, onyń ishinde: eńbek salasynda — 3 186; eńbek qaýipsizdigi jáne eńbekti qorǵaý boıynsha — 961; halyqty jumyspen qamtý boıynsha — 50.
Jumys berýshilerge 1 760 uıǵarym berilip, 234,4 mln teńge somasyna 2 311 ákimshilik aıyppul salyndy. Qabyldanǵan sharalardyń nátıjesinde 15,4 myń jumyskerdiń eńbek quqyǵy qorǵaldy.
