Memlekettik derekqor buzylǵan joq — Jaslan Mádıev
ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev qazaqstandyqtardyń jeke derekteriniń taralýyna qatysty pikir bildirdi.
— Bul jańartylǵan derekter emes, memlekettik derekqor buzylǵan joq. Bul buryn taralyp ketken derekter, qazir ol derekter darknette qoljetimdi. Olar qandaı da bir Telegram arnalarda paıda bolǵan jaǵdaıda dereý buǵattaımyz. Bul derekterge azdaǵan jańartý engizilgen bolýy múmkin. Atalǵan aqparat 2024 jylǵy 1 mamyrǵa deıingi merzimge jatady, jańa derekterdiń taralýy tirkelgen joq, — dep qysqa qaıyrdy Jaslan Mádıev Májilis qabyrǵasynda BAQ ókilderiniń saýalyna jaýap bere turyp.
Buǵan deıin qazaqstandyqtardyń jeke derekter qaıdan tarap ketkeni jóninde joramal aıtylǵan edi. Sonymen qatar jeke derekterdiń taralýyna qatysty tekserý júrgizilip jatyr. Sondaı-aq Roman Sklıar qazaqstandyqtardyń jeke derekteriniń urlanýy týraly pikir bildirgen edi.