Memlekettik bıýdjettiń kiristeri 6,4 trln teńgeni qurady – Qarjy mınıstri
ASTANA. KAZINFORM – Respýblıkalyq bıýdjet úshin munaıǵa salynatyn eksporttyq keden bajy salyǵy oń áserin tıgizdi. Bul týraly Úkimet otyrysynda 3 aıdyń áleýmettik-ekonomıkalyq damý qorytyndysyn talqylaý kezinde Qarjy mınıstri Mádı Takıev málim etti.
- Esepti kezeńde, memlekettik qarjynyń ornyqtylyǵy, barlyq áleýmettik mindettemelerdi der kezinde qarjylandyrý, óńirlerdi qoldaý, sondaı-aq kirister men shyǵystardy tsıfrlyq basqarylatyn modelge kóshý qamtamasyz etildi. Shıkizat pen valıýta naryǵynyń syrtqy qubylýyna qaramastan, jalpy negizgi bıýdjet parametrleri atqaryldy. Transfertterdi eseptemegende, memlekettik bıýdjettiń kiristeri 6,4 trln teńgeni nemese josparǵa 104,3 paıyzdy qurady. Ótken jyldyń osy kezeńimen salystyrǵanda, túsimder 931 mlrd teńgege nemese shamamen 17 paıyzǵa ósti, - dedi M.Takıev.
Onyń aıtýynsha, respýblıkalyq bıýdjet kiristeri 4,2 trln teńgege jetip, 102 paıyzǵa atqaryldy.
- Jergilikti bıýdjet jospardan 193 mlrd teńgege asyra oryndalyp, 2,3 trln teńge kóleminde túsim alyp keldi. 2025 jyldyń birinshi toqsanymen salystyrǵanda, salyq túsimderiniń ósýi 20%-dy qurady nemese 1 trln teńgeden asa túsim qamtamasyz etildi. Importtalatyn taýarlarǵa salynatyn qosylǵan qun salyǵy boıynsha túsimder 165 mlrd teńgege ulǵaıdy. Onyń ishinde aldyn ala beriletin derekterge sáıkes, qosylǵan qun salyǵy mólsherlemesiniń ulǵaıýy esebinen, ósim shamamen 80 mlrd teńgeni qurady. Esepti kezeńde bıýdjettiń kiris bóligine syrtqy makroekonomıkalyq faktorlar aıtarlyqtaı áser etti, onyń ishinde álemdik munaı naryǵy qubylyp tur. Birinshi toqsandaǵy munaıdyń ortasha baǵasy barreline 80,6 dollar deńgeıinde qalyptasty. Bul rette, qoldanystaǵy bıýdjet arhıtektýrasynda munaı baǵamynyń ósimi tikeleı Ulttyq qordyń túsimine áser etetinin atap ótý kerek, sebebi zańnamaǵa sáıkes munaı túsimderiniń negizgi bóligi Ulttyq qorǵa jiberiledi. Al respýblıkalyq bıýdjet úshin munaıǵa salynatyn eksporttyq keden bajy salyǵy oń áserin tıgizgen, osy rette qosymsha 40,5 mlrd teńgeni qamtamasyz etildi, - dedi mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.
