Memlekettik bilim granttary ıegerleriniń tizimi jarııalandy
ASTANA. KAZINFORM – Ǵylym jáne joǵary bilim mınıstrligi 2025-2026 oqý jylyna arnalǵan memlekettik bilim berý granttarynyń ıegerleri anyqtalǵanyn málimdedi.
QR Prezıdenti Qasym-Jomart Toqaevtyń tapsyrmasyna sáıkes, ekonomıkanyń basym salalary úshin joǵary bilikti kadrlardy daıarlaý maqsatynda granttardyń 60 paıyzy ınjenerlik jáne tehnıkalyq baǵyttarǵa bólindi.
Bıylǵy konkýrsqa 113 myńǵa jýyq ótinish kelip túsken. Bul kórsetkish ótken jylmen salystyrǵanda 9 myńǵa artyq. Memlekettik bilim berý tapsyrysy 99 paıyzǵa ıgerildi.
«Serpin» baǵdarlamasy aıasynda halyq tyǵyz qonystanǵan óńirlerden shyqqan 2 myńnan astam jas soltústik, shyǵys jáne ortalyq óńirlerdegi jetekshi joǵary oqý oryndaryna oqýǵa tústi.
Sonymen qatar, áleýmettik osal toptarǵa jatatyn balalar úshin zańnamada kózdelgen kvotalar saqtaldy. Al halyqaralyq olımpıadalar men sporttyq jarystardyń jeńimpazdaryna konkýrssyz granttar taǵaıyndaldy.
Mınıstrlik joǵary bilimniń qoljetimdiligin arttyrý maqsatynda qosymsha tetikterdi de iske qosty. Atap aıtqanda, Memleket basshysynyń tapsyrmasymen 5 jasqa tolǵan balaǵa esepshot ashý kezinde bastapqy bilim berý kapıtaly tólenetin «Keleshek» jınaqtaý júıesi engizildi. Bul júıe memlekettik syıaqyny, bankter men saqtandyrý uıymdarynyń da syıaqysyn alýǵa múmkindik beredi. Sondaı-aq jınaqtalǵan qarajatty «Ulttyq qor – balalarǵa» jobasymen biriktirý múmkindigi bar.
2024 jyly alǵash ret shyǵynnyń bir bóligin jabatyn saralanǵan granttar bólinip, qalǵanyn úmitker óz qarajaty nemese oqý nesıesi arqyly óteıdi. 2025 jyly mundaı granttar sany 300 bolady. Baıqaý qyrkúıek aıynda ótedi.
Buǵan qosa, bıyl alǵash ret merzimdi áskerı qyzmetin ótkerip jatqan azamattarǵa 2 010 grant bólindi. Bul shara olardyń áleýmettik beıimdelýin qamtamasyz etip, joǵary bilim alýǵa jol ashady.
Grant ıegerleriniń tolyq tizimi QR Ǵylym jáne joǵary bilim mınıstrliginiń saıtynda, Telegram-arnalarynda, sondaı-aq Ulttyq testileý ortalyǵynyń saıtynda qoljetimdi.
Grant týraly kýálik úsh jumys kúni ishinde https://grant.testcenter.kz saıtynda beriledi.
Qujattardy joǵary oqý oryndaryna tapsyrý 25 tamyzǵa deıin júrgiziledi.