Bilim granty ıegerleriniń tizimi shyqty
ASTANA. KAZINFORM — QR Ǵylym jáne joǵary bilim mınıstrligi 2026-2027 oqý jylyna arnalǵan memlekettik bilim berý granttarynyń ıegerleri tizimin jarııalady. Bıyl 75 myńnan astam talapker elimizdiń joǵary oqý oryndarynda tegin bilim alý múmkindigine ıe boldy.
Memlekettik bilim berý tapsyrysy ekonomıkanyń bilikti kadrlarǵa degen uzaq merzimdi suranysyn eskere otyryp qalyptastyryldy. Memleket basshysynyń tapsyrmasyna sáıkes, bilim berý granttarynyń 60%-y búginde eldiń ındýstrııalyq jáne tehnologııalyq damýy úshin strategııalyq mańyzǵa ıe ınjenerlik jáne tehnıkalyq daıarlaý baǵyttaryna bólindi.
Óńirlerdi bilikti mamandarmen qamtamasyz etý máselesine de erekshe kóńil bólindi. «Serpin» jobasy aıasynda eki myńnan astam grant ıegeri Soltústik, Shyǵys jáne Ortalyq Qazaqstandaǵy jetekshi joǵary oqý oryndarynda bilim alady.
— Bilim berý granty — bul tek joǵary bilimdi tegin alý múmkindigi ǵana emes. Bul — memlekettiń eldiń bolashaǵyna jáne árbir daryndy jasqa salǵan ınvestıtsııasy. Bıyl 75 myńnan astam talapker memlekettik grant ıegeri atandy. Sonymen qatar granttar konkýrsyn ótkizý qaǵıdalary ózgerissiz qalyp, onyń ashyqtyǵy men ádildigin qamtamasyz etti. Biz jastar úshin jańa múmkindikterdi júıeli túrde keńeıtip kelemiz. Búginde Qazaqstannan shyqpaı-aq álemniń jetekshi joǵary oqý oryndarynyń dıplomyn alýǵa bolady. Sondaı-aq elimizde jumys isteıtin sheteldik joǵary oqý oryndary men sheteldik ýnıversıtetterdiń fılıaldarynda oqý úshin de memlekettik granttar qarastyrylǵan. Bul — qazaqstandyqtar úshin sapaly halyqaralyq bilimniń qoljetimdiligin arttyrýǵa baǵyttalǵan taǵy bir mańyzdy qadam, — delingen habarlamada.
2026 jyly bilim berý granttaryn taǵaıyndaý konkýrsyna shamamen 127 myń ótinish tústi. Bul ótken jylmen salystyrǵanda 14 myńǵa kóp. Ótinishter sanynyń artýy memlekettik bilim berý tapsyrysy aıasynda joǵary bilim alýǵa degen suranystyń áli de joǵary ekenin kórsetedi.
Granttardy bólý barysynda zańnamada kózdelgen memlekettik qoldaýdyń barlyq tetikteri saqtaldy. Atap aıtqanda, halyqtyń áleýmettik osal toptaryna arnalǵan kvotalar, halyqaralyq olımpıadalar men iri sporttyq jarystardyń jeńimpazdaryna konkýrstan tys beriletin granttar, sondaı-aq merzimdi áskerı qyzmet ótkergen azamattarǵa arnalǵan 1816 grant qarastyryldy.
Konkýrs nátıjelerimen kelesi resmı aqparattyq resýrstardan tanysa alasyzdar.
Memlkettik bilim berý granttarynyń ıegerleriniń tizimi.
Memlekettik bilim berý grantynyń elektrondyq kýálikteri úsh jumys kúni ishinde QR ǴJBM Ulttyq testileý ortalyǵynyń grant.testcenter.kz saıtynda qoljetimdi bolady. Al joǵary oqý oryndaryna qujat qabyldaý 25 tamyzdy qosa alǵanǵa deıin jalǵasady.
