Memlekettik basqarý akademııasynda Toqaevtyń «Ádiletti qoǵamǵa – shynshyl sóz» kitaby talqylandy
ASTANA. KAZINFORM - QR Prezıdentiniń janyndaǵy Memlekettik basqarý akademııasynda Damý kúni aıasynda Memleket basshysy Qasym-Jomart Toqaevtyń «Ádiletti qoǵamǵa – shynshyl sóz» atty kitabyna arnalǵan zııatkerlik kezdesý ótti, dep habarlady akademııanyń baspasóz qyzmeti.
Іs-shara memlekettik basqarý júıesindegi reformalardyń ıdeologııalyq negizder, el damýynyń strategııalyq basymdyqtar jáne Prezıdent eńbeginde kóterilgen ózekti máseleler boıynsha pikir almasý maqsatynda óti.
Zııatkerlik kezdesýge Quryltaıdyń alǵashqy shaqyrylymynyń depýtaty Janarbek Áshimjan, Akademııanyń professor-oqytýshylar quramy, magıstranttar men doktoranttar qatysty.
Kezdesýdi Akademııa rektory Azamat Jolmanov júrgizip, Prezıdenttiń jańa eńbegi memlekettik qyzmetshiler úshin qundylyǵy joǵary saıası ári dúnıetanymdyq basylym ekenin atap ótti.
-Búgingi kezdesýimizdiń arqaýy bolyp otyrǵan Qazaqstan Respýblıkasy Prezıdenti Qasym-Jomart Kemeluly Toqaevtyń «Ádiletti qoǵamǵa – shynshyl sóz» kitaby da qazirgi tsıfrlyq tranformatsııa dáýirindegi memleketimizdiń aldynda turǵan maqsat-mindetterin naqtylaıtyn tujyrymdar jınaǵy. Kitap mazmunyna engen taqyryptardyń árqaısysy memleketimiz úshin ózekti, memleketttik qyzmetshi úshin qundy. Ult sapasy, Táýelsizdik, egemendik pen memlekettilik, Konstıtýtsııa, Ádiletti Qazaqstan, memlekettik basqarý, Prezıdenttik mıssııa, Zań men Tártip, Yntymaq pen birlik, Tsıfrlandyrý jáne jasandy ıntellekt sııaqty máselelerden bastalǵan oılar Qazaqstannyń búgingi damý baǵytyn da, erteńgi saıası órisin de naqty baǵdarlaýǵa múmkindik beredi, – dedi rektor.
Zııatkerlik kezdesýdiń arnaıy qonaǵy, Quryltaı depýtaty Janarbek Áshimjan Prezıdent eńbeginde kórinis tapqan ıdeıalardyń mazmunyna keńinen toqtalyp, olardyń elimizde júzege asyrylyp jatqan aýqymdy saıası jáne ınstıtýtsıonaldyq reformalarmen sabaqtastyǵyn jan-jaqty saralady. Depýtat ádiletti qoǵam qurý, zań ústemdigin qamtamasyz etý, ulttyq birlikti nyǵaıtý jáne jaýapty memlekettik basqarý qaǵıdattary Memleket basshysy júrgizip otyrǵan reformalardyń ózegine aınalǵanyn atap ótti.
Kezdesý barysynda sondaı-aq Akademııanyń Basqarý ınstıtýty dırektorynyń orynbasary, saıası ǵylymdar kandıdaty Dastan Kósherbaev Prezıdent eńbegine ǵylymı-saraptamalyq taldaý jasap, kitaptaǵy saıası fılosofııanyń mazmuny men memlekettik basqarý júıesin jetildirýdegi mańyzyna toqtaldy.
Іs-sharanyń ereksheligi – pikirtalasqa Akademııa magıstranttary men doktoranttarynyń belsendi qatysýy boldy. Ortalyq jáne jergilikti memlekettik organdarda qyzmet atqaryp júrgen bilim alýshylar kitapta kóterilgen ıdeıalar jóninde óz oılaryn ortaǵa salyp, memlekettik qyzmettiń kásibıligin arttyrý, reformalardyń mánin tereń túsiný jáne memlekettik qyzmetshiniń jaýapkershiligi týraly pikir almasty.
Jıyndy qorytyndylaǵan Memlekettik basqarý akademııasynyń vıtse-rektory Elmıra Orazalıeva Prezıdenttiń «Ádiletti qoǵamǵa – shynshyl sóz» eńbegi tarıhı dáıeksózder jınaǵy ǵana emes, Ádiletti Qazaqstandy qalyptastyrýdyń naqty baǵyt-baǵdaryn aıqyndaıtyn mańyzdy eńbek ekenin aıtty.
Zııatkerlik kezdesý qatysýshylar úshin Prezıdenttiń strategııalyq kózqarastaryn zerdeleıtin, memlekettik basqarý salasyndaǵy zamanaýı úrdisterdi paıymdaıtyn jáne kásibı tájirıbe almasýǵa múmkindik bergen mańyzdy pikirtalas alańyna aınaldy.
Osyǵan deıin Kókshetaýda Prezıdenttiń «Ádiletti qoǵamǵa – shynshyl sóz» atty jańa kitaby tanystyrylǵan bolatyn.
