Memlekettik basqarý akademııasy: Jańa Konstıtýtsııa qoǵamdyq qatynastardyń quqyqtyq rettelýin jetildiredi
ASTANA. KAZINFORM – Memlekettik basqarý akademııasy dırektor orynbasary Quralaı Sadyqova «Referendým-2026» atty onlaın-marafonda jańa Konstıtýtsııa jobasy memlekettik organdardyń halyqpen jumys qaǵıdatyn ózgertetinin aıtty.
– Eń bastysy, qoǵamdyq qatynastar quqyqtyq turǵydan rettele tústi. Árbir azamat óziniń bostandyǵy aıaqtalǵan jerde, basqa adamnyń bostandyǵy men quqyǵy bastalatynyn durys túsiný kerek. Ol shekten asyp ketýge bolmaıdy. Bul zań buzý bolyp esepteledi, - dedi sarapshy.
Memlekettik basqarý akademııasy dırektor orynbasary jańa Konstıtýtsııa kúndelikti ómirde moraldik qaǵıdattarmen qatar quqyqtyq qaǵıdattardy da saqtap júrý ádetin qazaqstandyqtardyń ómir saltyna aınaldyratynyn aıtady.
– Munyń ekinshi jaǵy bar. Quqyq normalary, zańdar áleýmettik ádildik turǵysynan qalyptastyrylýy kerek. Eger memlekettik apparat pen halyq arasyndaǵy qarym-qatynas týraly aıtsaq, Ata zań jobasynda ekeýin eki jaqqa bóletin túsinik joq. Óıtkeni memlekettik bıliktiń bastaýy halyq ekeni aıqyndalǵan. Ol óziniń ókilderi ókildik demokratııa qaǵıdaty arqyly saılaıdy. Konstıtýtsııanyń talaby boıynsha, kez kelgen ótinish, usynys adamǵa baǵdarlanǵan qaǵıda arqyly qarastyrylýy kerek, - dedi Quralaı Sadyqova.
Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00-de bastalǵan onlaın-marafon saǵat 18:00-ge deıin jalǵasady dep josparlanǵan.