Memlekettik baǵdarlama boıynsha ıpotekalyq, jaldamaly turǵyn úıler qalaı úlestiriledi – maman jaýaby
ASTANA. KAZINFORM – Elimizde memlekettik turǵyn úı baǵdarlamalary aıasynda ıpotekaǵa, jalǵa beriletin páterler salymshylar arasynda qalaı bólinedi? Osy jáne ózge de saýaldarǵa Otbasy bankiniń ókili jaýap berdi.
- Ipotekalyq páterler úlestiretin kezde aldymen áleýmettik osal topqa jatatyn azamattardyń ótinimine nazar aýdarylady. Ol kisiler artyqshylyq beriledi, ıaǵnı alǵash beriletin páterlerge úmitti. Odan ári retimen basqa sanattaǵy azamattar arasynda úılestiriledi. Jaldamaly páterlerdi úlestirý boıynsha, ol jerde azamattyń turǵyn úı kezegine turǵan merzimge baılanysty. Aıta ketetin jaıt, jaldamaly páterdi turyp jatqan otbasy atyna jekeshelendirý máselesi jergilikti atqarýshy organdarmen shart jasasqan kezde belgili bolady, - dep túsindirdi Otbasy bankiniń ókili Raýan Maqsuthanov ıpotekalyq, jaldamaly turǵyn úılerdi bólý taqyrybyna arnalǵan áleýmettik jelide ótken tikeleı efır kezinde.
Odan bank mamany kredıttik (nesıelik) baspana alý erejelerin túsindirdi.
- Páterdi nesıe arqyly birden óz atyńyzǵa aýdaryp alýǵa bolady. Bul baǵdarlama burynnan bar jáne kópke tanymal. Ózderińiz biletin «Baqytty otbasy», «Shańyraq» turǵyn úı baǵdarlamasyn aıasynda qoldanyldy. Qazir ol baǵdarlamalar toptastyryldy, biz ony bir aýyzdan kontseptsııa deımiz, kontseptsııa kezinde belgili kólemde páterler beriledi. Mysaly, jergilikti atqarýshy organ 100 páterli turǵyn úı saldy. Jergilikti atqarýshy organ bizdiń bankke ótinish jazady, 100 páterdi kontseptsııa aıasynda júzege asyryp, úılestirýimizdi suraıdy. Ótinish negizinde páterler bank portalyna engiziledi, barlyq málimet tekseriledi, sodan soń biz páterlerge konkýrs jarııalaımyz. Páterler konkýrsqa kelip túsken ótinimder negizinde salymshylar arasynda úlestiriledi, - deıdi ol.
Jyl basynda Úkimet basshysy Oljas Bektenov jalǵa beriletin jeńildikti turǵyn úı baǵdarlamasyn keńeıtý qajettigin tapsyrǵan edi.
Qyrkúıekte salynyp jatqan úıden Otbasy bank arqyly ıpoteka rásimdeýdiń talaptary týraly jazǵan bolatynbyz.