Memlekettik baǵdarlama arqyly úı almaq bolǵan aqtóbelik 10 mln teńgesinen aıyryldy
AQTÓBE. KAZINFORM - Tanysyna sengen aqtóbelik eki jyldan soń ǵana polıtsııaǵa aryz túsirdi. Quqyq qorǵaý organdary kúdiktiniń taǵy qansha adamdy aldaǵanyn anyqtap jatyr.
Aqtóbe polıtsııasy «memlekettik baǵdarlama arqyly páter alyp beremin» dep aqsha jymqyrǵan alaıaqtyq isti tergep jatyr. Aqshasynan aıyrylǵan jábirlenýshi aryz túsirdi.
- Shamamen eki jyl buryn jergilikti turǵyn tanysynyń senimine kirip, memlekettik baǵdarlama aıasynda turǵyn úıdi tıimdi sharttarmen alýǵa múmkindik bar ekenin aıtqan. Úıdi rásimdeý jáne túrli máselelerdi sheshý úshin tanysynan 10 mln teńge aqsha alǵan. Alaıda ýáde oryndalmaǵan, sondaı-aq jábirlenýshiniń aqshasy qaıtarylmaǵan. Jedel-izdestirý is-sharalary barysynda kúdiktiniń kim ekenin anyqtalyp, polıtsııa bólimine jetkizildi. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Sonymen qatar kúdiktiniń osyǵan uqsas basqa da faktilerge qatystylyǵy tekseriledi,- dedi Aqtóbe oblystyq PD baspasóz qyzmeti.
Eske salsaq, buǵan deıin páter jalǵa beremin dep ondaǵan adamnan aqsha alǵan aqtóbelik sottaldy. Sottalýshy jarnama saıty arqyly habarlandyrý berip, aldyn ala tólem qabyldap otyrǵan. Ol sotta taǵylǵan aıypty moıyndady.
