Memlekettik aıyptaýshy sottan Sultan Sarsemalıevti ómir boıyna bostandyǵynan aıyrýdy surady

Atyraý oblystyq prokýratýrasynyń bólim prokýrory Mıras Baýyrjanovtyń aıtýynsha, bul qylmys úlken josparǵa negizdelgen.

— Sottalýshy Sarsemalıevtiń áreketiniń saldarynan bir shańyraqtyń shyraǵy máńgilikke sóndi. Іs barysynda barlyq dálelder zertteldi. Materıaldar jan jaqty qaraldy. Sottalýshy jábirlenýshiler úshin bóten adam emes, kúıeý balasy boldy, -dep sózin bastady memlekettik aıyptaýshy.

Keıin ol ár qylmysqa jeke jeke toqtalyp, aıyptardyń qandaı jaǵdaıǵa baılanysty taǵylǵanyn aıtty.

— Aıyptalýshy Sultan Sarsemalıev burynǵy áıeliniń áke-sheshesi men baýyrlaryn óltirip, marqumdardyń kartalary men telefondaryn paıdalanyp, alaıaqtyq jasaǵan. Jábirlenýshilerdiń zeınetaqysyn ıemdený úshin shot ashqan. Onyń is-áreketi asa aýyr qylmysqa jatady. Qylmystyq kodekstiń 53,54 baby boıynsha onyń jazasyn jeńildetetin mán-jaılar anyqtalǵan joq. Sottalýshy alǵashqy qylmysyn jasaǵannan keıin is-áreketin toqtatpaǵan. Bul sanaly júzege asyrylǵan qylmystyq jospar, -dedi memlekettik aıyptaýshy Mıras Baýyrjanov.

Ótken sot otyrysynda memlekettik aıyptaýshy aıyptaý aktisine ózgeris engizdi. Aıyptalýshyǵa ınternet arqyly alaıaqtyq jáne mal urlyǵy boıynsha jańa aıyptar taǵylyp, adam óltirý baptarynyń quqyqtyq saralanýy tolyqtyryldy.

Buǵan deıin Sultan Sarsemalıev qaıynaǵasy Naýryzdy Muqanǵalıevti ózin qorǵaý maqsatynda óltirgenin aıtqan bolatyn. Alaıda memlekettik aıyptaýshy bul epızod boıynsha ustanymyn ózgertpeı, qylmys qasaqana jasalǵan degen aıypty sol kúıinde qaldyrdy.
Sot barysynda memlekettik aıyptaýshy mal satýǵa qatysty burynǵy alaıaqtyq aıybynyń da ózgertilgenin habarlady.

Ótken joly Sultan Sarsemalıev óz telefonynda saqtalǵan aýdıojazbany dálel retinde usynyp, ony marqum Naýryz Muqanǵalıev tarapynan aıtylǵan qoqan-loqqymen baılanystyrǵan edi. 

Jábirlenýshi tarap kúdiktiden 70 mln teńge moraldyq ótemaqy talap etti. 

Sot protsesi kezinde is boıynsha jınalǵan zattaı dálelder kórsetildi. Olardyń qatarynda marqumdardyń jeke qujattary, bank kartalary, baılanys quraldary jáne qylmysqa qatysty basqa da aıǵaqtar bar. 

Sondaı-aq Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan. 

Aqbaıan Muqanǵalıevanyń da tergeý kezinde ne aıtqany belgili boldy. 

Aıta keteıik, kúdikti ata-enesin óltirgennen keıin enesiniń altyndaryn lombardqa ótkizgen.

Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.

Aıyptalýshy Sultan Sarsemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.

Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty. 

Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.

Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.

Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.

Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy. 

Eske salsaq, Jangeldın aýylynda turatyn otbasy 2025 jyldyń sońynda belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.