Memlekettik aýdıtten keıin sport salasynda baqylaý men esepke alý kúsheıtiledi
ASTANA. KAZINFORM — Joǵary aýdıtorlyq palata júrgizgen memlekettik aýdıtten keıin otandyq sportshylardy tárbıeleý jáne daıarlaý salasynda birqatar shara qabyldandy.
Memleket basshysy Qasym-Jomart Toqaev sport salasynda tártip ornatý boıynsha dáıekti saıasat júrgizýde. Atap aıtqanda, bıyl sáýirde Prezıdent dene shynyqtyrý jáne sport zańnamasyna ózgerister engizetin zańǵa qol qoıdy. Sonymen qatar basym sport túrlerin bekitý tártibi qaıta qaralyp, sheteldik legıonerlerdi bıýdjet esebinen qarjylandyrýǵa tyıym salyndy.
Óz kezeginde Joǵary aýdıtorlyq palata osy jazda sport salasynda aýdıtorlyq is-shara ótkizdi. Nátıjesinde respýblıkanyń sporttaǵy jetistikterine áser etetin buzýshylyqtar men kemshilikter anyqtalyp, olardy joıý boıynsha naqty tapsyrmalar berildi.
Máselen, Sport isteri komıtetine sporttyq rezervti qalyptastyrý úshin daryndy balalardy izdeýde mekteptegi dene shynyqtyrý páni muǵalimderin tartý joldaryn pysyqtaý tapsyryldy.
— Taldaý nátıjesinde respýblıka mektepterinde 32 myńnan astam dene shynyqtyrý páni muǵalimi jumys isteıtini, alaıda olardyń áleýeti bolashaǵy bar oqýshylardy iriktep, olardy mamandandyrylǵan oqý oryndary men uıymdarda ári qaraı sporttyq daıarlyqtan ótkizý isinde tolyq paıdalanylmaı otyrǵany anyqtaldy, — delingen habarlamada.
Nátıjesinde týrızm jáne sport mınıstriniń m. a. sheshimi boıynsha mektepterde sporttyq qabiletteri aıqyn balalar qatarynan jınaqtalatyn mamandandyrylǵan sport synyptary engizile bastaıdy. Bul olarǵa ádettegi oqýmen qatar jattyǵýlardy biriktirýge múmkindik beredi. Іrikteýdi dene shynyqtyrý muǵalimderi men sport uıymdarynyń jattyqtyrýshylary birge júrgizedi. Osylaısha, Qazaqstanda bilim berý jáne sport komponentterin biriktiretin sporttyq rezervti daıarlaýdyń keshendi júıesi qalyptasyp keledi.
— Bul talantty jas sportshylardy anyqtaýǵa jáne damytýǵa múmkindik berip, eldiń halyqaralyq jarystardaǵy múmkindigin arttyrady, — dep habarlady Joǵary aýdıtorlyq palatadan.
Sonymen qatar Joǵary aýdıtorlyq palatanyń tapsyrmasyna boıynsha Mınıstrliktiń vedomstvolyq baǵynysty uıymdary býhgalterlik esep pen eseptilik júrgizý barysynda anyqtalǵan kemshilikter men buzýshylyqtardy joıý boıynsha sharalar qabyldady. Bul óz kezeginde ashyqtyqty arttyryp, jeke jaýapkershilikti nyǵaıtady, qatelikter qaýpin azaıtady jáne bıýdjet qarajatynyń paıdalanylýyn baqylaýdy jeńildetedi.
Sondaı-aq Joǵary aýdıtorlyq palatanyń tapsyrmalaryn oryndaý maqsatynda bıýdjet jáne ózge de zańnamany buzǵany úshin myna vedomstvolyq jáne vedomstvolyq baǵynysty uıymdardyń laýazymdy tulǵalary tártiptik jaýapkershilikke tartyldy:
QR Týrızm jáne sport mınıstrligi Sport jáne dene shynyqtyrý isteri komıteti; «Sportty damytý dırektsııasy» RMQK; «Respýblıkalyq sport kolledji» RMQK;
«Qajymuqan Muńaıtpasov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji» RMM;
«Almaty» olımpıadalyq daıarlaý ortalyǵy» RMQK; «Alataý» qysqy sport túrleri boıynsha respýblıkalyq joǵary sport sheberligi mektebi» RMQK.
Osylaısha, sportshylardy daıarlaý júıesinde anyqtalǵan kemshilikterge memleket keshendi túrde den qoıyp otyr.
Mektepter arqyly talanttardy izdeýdiń jańa mehanızmderi engizilip jatyr, qarajatty esepke alý jáne baqylaý kúsheıtiledi, jekelegen quqyq buzýshylyqtar joıylmaq. Bul sharalar Qazaqstandaǵy sport rezervin daıarlaý júıesiniń turaqtylyǵy men nátıjeliligin arttyrýǵa yqpal etedi. Memlekettik aýdıt qorytyndysy boıynsha berilgen ózge de tapsyrmalardyń oryndalýy baqylaýa bolady.
Buǵan deıin habarlanǵandaı, memlekettik aýdıtten keıin «Jezqazǵan-Eır» AQ-ǵa qatysty antımonopolııalyq tergeý materıaldary QMA-ǵa joldanady.