Memlekettik aýdıtorlar 355 mlrd teńgege zań buzýdy anyqtady

ASTANA. KAZINFORM — Onyń ishinde: 3,3 mlrd teńge qarjylyq zań buzý, 287,6 mlrd teńge memleket qarajaty men resýrstaryn tıimsiz paıdalaný, 64,6 mlrd teńge josparlaý kemshilikteri. Bul týraly Joǵary aýdıtorlyq palatanyń baspasóz qyzmeti habarlady. 

— 2025 jyldyń І toqsanynda 24 nysanda 4 aýdıtorlyq is-shara aıaqtaldy. 5,9 trln teńge qamtyldy. 355 mlrd teńgege zań buzý anyqtaldy. Onyń ishinde: 3,3 mlrd teńge qarjylyq zań buzý, 287,6 mlrd teńge memleket qarajaty men resýrstaryn tıimsiz paıdalaný, 64,6 mlrd teńge josparlaý kemshilikteri, — delingen habarlamada.

3,3 mlrd teńge qalpyna keltirilýi tıis qarjynyń 1 mlrd teńgesi bıýdjetke qaıtaryldy.

Úkimetke 32 usynym joldanyp, aýdıt obektilerine 159 tapsyrma berildi. Olar tolyq oryndalǵanǵa deıin Joǵary aýdıtorlyq palatanyń baqylaýynda bolady.

Jalpy 2025 jyly shamamen 30 aýdıtorlyq is-sharany aıaqtaý josparlanǵan.

— Joǵary aýdıtorlyq palata memlekettik aýdıtte strategııalyq jáne táýekelge baǵdarlanǵan tásildi nyǵaıtý tájirıbesin jalǵastyrady. 2024 jyldyń qorytyndylary kórsetkendeı, sapaly baqylaý — bul tek mindetti qadaǵalaýmen shektelmeıtin, sonymen qatar bıýdjetke qarajatty qaıtarýdyń, buzýshylyqtardyń aldyn alýdyń jáne qoǵamnyń memlekettik bılik organdaryna degen senimin arttyrýdyń tıimdi mehanızmi, — delingen Joǵary aýdıtorlyq palatanyń habarlamasynda.

Aıta ketelik Aýdıtorlyq palata respýblıkalyq bıýdjetten bólingen 207 mln teńge tıimsiz jumsalǵanyn anyqtaǵan edi.