Memlekettik arhıv qujattary tsıfrlanyp, qyzmetkerlerdiń jalaqysy ósti
ALMATY. KAZINFORM – Almaty qalasynyń memlekettik arhıvindegi qujattardyń 10 mln astam paraǵy tsıfrlandyryldy. Tehnıkalyq turǵyda kúrdeli jumysty tez ári sapaly iske asyrý úshin memlekettik muraǵat materıaldyq-tehnıkalyq bazany jańartyp, qujattardy qalpyna keltirý zerthanasyn ashty.
Almaty qalalyq mádenıet basqarmasynyń basshysy Ǵanı Maılybaevtyń aıtýynsha, osy maqsatta jergilikti bıýdjetten sońǵy 10 jylda birinshi ret qarjy bólingen.
«Osylaısha, Almatynyń memlekettik arhıvi planetarlyq tıptegi kópformatty jeti skaner, A3 jáne A2 formatyndaǵy kóp aǵyndy jeti skaner, obektilerdiń 3D ınteraktıvti keskinin jasaýǵa arnalǵan júıe, mıkrofılmge arnalǵan COM júıesin, mıkrofılm oqýǵa arnalǵan jabdyqty, keń formatty plotterdi, elektr gılotınin, qujattardy qalpyna keltirýge arnalǵan press jabdyǵyn, jaryq ústelin, qaǵaz jáne pergament betindegi qujattardy qalpyna keltirýge arnalǵan mýltıfýnktsıonaldy jabdyqty, sondaı-aq 110 monoblok pen 34 kompıýter satyp aldy»,- deıdi basqarma basshysy.
Sonymen qatar ol arhıvte qaǵaz betindegi jáne aýdıovızýaldy qujattardy tsıfrlandyrý jumysy qarqyndy júrip jatqanyn jetkizdi.
«Qaǵaz qujattardy tsıfrlyq formatqa kóshirý – ýaqyt talaby. Qala ákimi Erbolat Dosaev sala ókilderine úlken qoldaý kórsetý úshin birqatar sheshim qabyldady. Máselen, sońǵy eki jylda arhıvtegi materıaldyq-tehnıkalyq baza jańaryp, mamandardyń jalaqysy 30%-ǵa ósti. Sondaı-aq mekemedegi statsıonarlyq sórelerdiń ornyna mobıldi sóreler alyndy. Sol arqyly qujat qabyldaý jáne saqtaý orny keńeıdi», – dedi Ǵanı Maılybaev.
