Memlekettik apparat qaǵazbastylyqtan arylýy qajet – Prezıdent

ASTANA. KAZINFORM – Memleket basshysy Qasym-Jomart Toqaev memlekettik basqarý júıesin túbegeıli reformalap, JI kómegimen qaıtalanatyn mindetter men basqarýdaǵy qarama-qaıshylyqtardy joıý qajettigin aıtty. Prezıdent óz Ákimshiligine 2027 jylǵy 1 maýsymǵa deıin memlekettik basqarý júıesin reformalaýdyń keshendi josparyn ázirleýdi tapsyrdy.

Memlekettik qyzmet kórsetýde 45 myńnan astam zań buzýshylyq anyqtaldy
Foto: Mýhtor Holdorbekov/Kazinform

Prezıdenttiń aıtýynsha, árbir mekeme óz ókilettigimen qatar, tutas memlekettik apparattyń qalaı jumys isteıtinin naqty bilýge tıis.

Memlekettik apparat qaǵazbastylyqtan tolyq jáne birjola arylýy qajet. Sheshim qabyldaýǵa, ıaǵnı damýǵa kedergi keltiretin barlyq rásimdi qysqartý kerek. JI kómegimen qaıtalanatyn mindetterdi, basqarý júıesindegi qarama-qaıshylyqtardy joıý kerek.

– Memlekettik qyzmetshiler kásibı bilikti, ozyq maman bolýǵa tıis. Ókinishke qaraı, ázirge mundaı deńgeıge jettik dep aıtý qıyn. Sondyqtan memlekettik qyzmetshilerge arnalǵan jańa ádep qaǵıdattaryn ázirlegen jón. Memlekettik qyzmetshi, eń aldymen, Konstıtýtsııa talaptaryn basshylyqqa alyp, Otanyna jáne halqyna adal qyzmet etýge tıis. Bul jerde jekelegen ózgerister týraly sóz bolyp otyrǵan joq, – dedi Memleket basshysy Qazaqstan halqyna Joldaýynda.

Memleket basshysy shynaıy reforma qajet ekenin, kózboıaýshylyqqa jol berýge bolmaıtynyn basa aıtty. Bul – quqyqtyq jáne qarjylyq sharalar qabyldaýdy talap etetin asa kúrdeli úderis.

– Prezıdent Ákimshiligi 2027 jyldyń 1 maýsymyna deıin memlekettik basqarý júıesin reformalaýǵa qatysty keshendi jospar usynýy kerek. Bir sózben aıtqanda, memlekettik basqarý júıesin tsıfrlyq tehnologııa men jasandy ıntellektige negizdelgen jańa ekonomıkaǵa beıimdep, jańǵyrtý qajet, – dedi Prezıdent.

Buǵan deıin Prezıdent Qazaqstannyń tranzıttik áleýetin synǵa alǵan edi.

Negizsiz járdemaqylardyń kóbeıýi memlekettik basqarýdyń álsizdigin kórsetetini de aıtyldy.

Sondaı-aq Q.Toqaev orynsyz shyǵyndy boldyrmaý úshin JI paıdalanýdy usyndy.