Memlekettik áleýmettik saqtandyrý qoryna shekten tys salmaq túsirgen oblystar belgili boldy
ASTANA. KAZINFORM – Eńbek jáne halyqty áleýmettik qorǵaý mınıstrligindegiler Kazinform saýalyna joldaǵan jaýapta Memlekettik áleýmettik saqtandyrý qoryna shekten tys salmaq túsirip otyrǵan oblystardy atady.
Vedomstvonyń deregine súıensek, atalǵan qor jyl saıyn 1 mıllıonnan astam azamatqa áleýmettik táýekeldiń 6 túri boıynsha áleýmettik tólem beredi. Onyń 82%-dan astamy bala kútimine baılanysty tólemderge tıesili.
Mınıstrliktiń aqparaty boıynsha, 2024 jyly 15 óńirde mindetti áleýmettik saqtandyrý júıesine qatysýshylarǵa berilgen áleýmettik tólemder kólemi áleýmettik aýdarymdar túsiminen asyp túsken.
Aıta ketsek, jýyrda Eńbek jáne halyqty áleýmettik qorǵaý mınıstrliginiń keńeıtilgen alqa májilisinde vedomstvo basshysy Svetlana Jaqypova júktilik jáne bosanýǵa qatysty asyra tólem alǵan 113 adamǵa qatysty qylmystyq is qozǵalǵanyn aıtty.
Mınıstrlik júktilik pen bosaný tólemderiniń somasyn úlkeıtýdiń ádisterin úıretetin konsýltatsııalyq qyzmetterdiń ústinen shaǵym túsirgen.
Sondaı-aq byltyr kúzde Antıkor Shyǵys Qazaqstan oblysynda 780 áıeldiń dekrettik tólemdi arttyrý úshin jeke kásipker retinde tirkelgenin anyqtaǵan bolatyn.
Eske salaıyq, bıyl áleýmettik saladaǵy tólemder kóleminde qandaı ózgerister bolatyny jarııalanǵan edi.