«Memlekettik áleýmettik saqtandyrý qory» AQ jańa basshysy taǵaıyndaldy
ASTANA. KAZINFORM - QR Eńbek jáne halyqty áleýmettik qorǵaý mınıstri Svetlana Jaqypova ujymǵa «Memlekettik áleýmettik saqtandyrý qory» AQ bas dırektory bolyp taǵaıyndalǵan Arǵynǵazınov Aıbol Arǵynǵazyulyn tanystyrdy.
Bul týraly Kazinform mınıstrliktiń baspasóz qyzmetine silteme jasap habarlaıdy.
Arǵynǵazınov Aıbol Arǵynǵazyuly Jetisý oblysynda dúnıege kelgen. Prezıdenttik jastar kadrlyq rezerviniń múshesi.
L.N. Gýmılev atyndaǵy Eýrazııa ulttyq ýnıversıtetiniń ekonomıka fakýltetin, «Joǵarǵy ekonomıka mektebi» Ulttyq zertteý ýnıversıtetiniń (Máskeý qalasy) ekonomıka ǵylymdary fakýltetin támamdaǵan.
Eńbek jolyn QR Ulttyq ekonomıka mınıstrliginde sarapshy bolyp bastaǵan, ár jyldary «Qazkontent» AQ bólim basshysy, «Ekonomıkalyq zertteýler ınstıtýty» AQ Taldaý jáne álemdik ekonomıka ortalyǵynyń dırektory, QR Ulttyq ekonomıka mınıstriniń keńesshisi, QR Prezıdenti Ákimshiligi Basshysy Hatshylyǵynyń sektor meńgerýshisi bolǵan.
2022 jyldan QR Qarjy mınıstrligi Bıýdjettik kredıtteý, Qazaqstan Respýblıkasynyń Ulttyq qory jáne qarjy sektory máseleleri boıynsha ózara is-qımyl departamentiniń dırektory bolyp eńbek etti.
