Memlekettik akademııalyq bı teatryna Bolat Aıýhanovtyń esimi berildi
ASTANA. KAZINFORM — Qazaqstan Respýblıkasynyń Memlekettik akademııalyq bı teatry endi onyń negizin qalaýshy, kórnekti horeograf Bolat Aıýhanovtyń esimimen atalady.
Mádenıet jáne aqparat mınıstrliginiń baspasóz qyzmeti atap ótkendeı, atalǵan sheshim Memleket basshysy Qasym-Jomart Toqaevtyń tapsyrmasyna sáıkes qabyldandy.
Bolat Aıýhanov — Qazaqstandaǵy kameralyq balet óneriniń negizin qalaǵan biregeı tulǵa. Ol 1967 jyly «Almatynyń jas baletin» qurdy. Keıin bul óner ujymy el ishinde ǵana emes, shetelde de keńinen tanylyp, Keńes Odaǵy respýblıkalarynda, Eýropa men Skandınavııa elderinde óner kórsetti.
Teatr ujymy ondaǵan jyl boıy horeograf qalyptastyrǵan shyǵarmashylyq mekteptiń dástúrin jalǵastyryp keledi.
— Búginde Bolat Aıýhanovtyń qoıylymdary ulttyq horeografııa óneriniń altyn qoryna endi. Ustazdyq jolynda talaı daryndy ártisti tárbıelegen ol tutas bir býynnyń kásibı qalyptasýyna eńbek sińirdi. Teatrdyń 60-maýsymynyń ashylý qarsańynda Bolat Aıýhanovtyń esiminiń berilýi erekshe mánge ıe. Bul — kórnekti horeograftyń qazaq balet ónerine sińirgen eńbegine berilgen joǵary baǵa, — delingen habarlamada.
2027 jyly teatrdyń qurylǵanyna 60 jyl tolady. Mereıtoı qarsańynda teatr ujymy óner ıesiniń mol shyǵarmashylyq murasyn jalǵastyryp, ulttyq balet mektebiniń ozyq dástúrlerin saqtap keledi. Ujym klassıkalyq, ulttyq, neoklassıkalyq jáne zamanaýı horeografııa baǵyttaryn da júıeli túrde damytyp otyr.
Buǵan deıin elde teatrlarǵa qyzyǵýshylyq artyp keledi jatqanyn, kórermen sany 2,8 mıllıonnan asqanyn jazǵanbyz.
