Memlekettiń senimdi áriptesi
ASTANA. QazAqparat - Táýelsizdiktiń jıyrma bes jylyndaǵy mańyzdy jetistikterdiń biri - úkimettik emes sektordyń memlekettiń senimdi áriptesine aınalyp, qarqyndy damýy. Memleket basshysynyń qoldaýynyń arqasynda qoǵamdyq uıymdardyń iskerlik jáne sapalyq deńgeıi jańa belesterge kóterilip, úlken áleýmettik jáne saıası qozǵaýshy kúshti biriktirgenin jetinshi ret uıymdastyrylǵan «Táýelsizdikke 25 jyl: damý, jetistik, keleshek» taqyrybynda ótken oblystyq úkimettik emes uıymdardyń forýmynda aıqyn sezindik, dep jazady Jambyl oblystyq «Aqjol» gazeti
Úkimettik emes uıymdar kóshbasshylary, oblystyq basqarmalar men mekeme basshylary jáne qoǵamdyq birlestikterdiń ókilderi bas qosqan forýmǵa oblys ákiminiń orynbasary Erqanat Manjýov qatysty. Jıyndy oblystyq ishki saıasat basqarmasynyń basshysy Rahııa Turmahanbetova júrgizdi.
Derekke súıensek, búginde oblysta 700-den astam kommertsııalyq emes uıymdar men qoǵamdyq qorlar tirkelgen eken. Olardyń belsendi qyzmet etetini - 200-den astam. Aǵymdaǵy jyly osy uıymdar utyp alǵan áleýmettik jobalardy qarjylandyrýǵa 465 mıllıon teńge bólingen. Bul ótken jylmen salystyrǵanda 132 mıllıon teńgege artyq.
- Búginde memlekettik organdar úkimettik emes uıymdardy baǵdarlamalardy ázirlep, iske asyrýǵa, áleýmettik mańyzdy máseleler boıynsha qoǵamdyq tyńdaýlardy ótkizýge keńinen tartýdy tájirıbelerinde tıimdi paıdalanýda. Sonyń arqasynda memlekettik organdar men úkimettik emes uıymdardyń yntymaqtastyǵy júıeli sıpatqa ıe bolyp úlgerdi. Qazirgi tańda úkimettik emes uıymdarǵa memlekettik teń seriktesi retinde qaraıdy.
Sonymen qatar, qoǵamdyq uıymdar óz qyzmetterin usynýdy aqparattyq túrden áleýmettik jaǵyna basa mán berip, geografııasyn keńeıtip otyr. Ásirese múgedektermen, jastarmen jumys durys jolǵa qoıylǵan. Ekologııa problemasyn kóterý sııaqty memlekettik baǵdarlamalardyń oryndalýyna, memlekettik qyzmet kórsetýdiń sapasyna monıtorıng júrgizý jobalary júzege asyrylýda», - dedi Rahııa Seıitbekqyzy azamattyq qoǵamnyń damý barysyna toqtalyp.
Oblys ákiminiń orynbasary Erqanat Manjýov búgingi tańda úkimettik emes uıymdardyń qoǵamdaǵy róliniń artyp kele jatqanyn tilge tıek etti.
- Táýelsizdiktiń alǵashqy jyldarynan bastap Elbasy N.Á.Nazarbaevtyń basshylyǵymen elimizde jańa ıdeıalar júzege asyrylyp, Qazaqstandaǵy táýelsiz memleket qurýdaǵy basym baǵyt azamattyq birlik pen halyqtardyń rýhanı-mádenı qaýymdastyǵyna negizdelip, demokratııalyq reformalarǵa keń óris ashyldy. Sonyń biri - osy úkimettik emes uıymdar.
Memleket basshysy azamattyq qoǵam belsendiligin arttyrýda - úshinshi sektorǵa úlken mindetter júktep, zor senim artyp keledi. Elimizde Jalpyǵa birdeı eńbek qoǵamyn qurýda - memleket, bıznes jáne úkimettik emes sektor aıryqsha mańyzǵa ıe bolyp otyr. Óıtkeni, memlekettik saıasattyń bir baǵyty azamattyq qoǵam belsendiligin kóterýge negizdelip otyr. Bul mańyzy zor jumystar bizdiń oblysta da óz jalǵasyn taýyp keledi. Sonyń nátıjesinde Úkimettik emes uıymdar úshin úlken múmkindikterge jol ashylyp, olar búginde óńirdiń áleýmettik-ekonomıkalyq, qoǵamdyq-saıası jáne rýhanı ómiriniń damýyna óz úlesterin qosýda. Olardy qarjylaı qoldaýǵa bólinetin qarjy kólemi de jyl sanap artyp keledi. Jergilikti atqarýshy organdar arasyndaǵy ózara baılanys ta nyǵaıa tústi.
Qoǵamdyq birlestikterdiń áleýetin utymdy paıdalaný - ózekti másele. Sondyqtan úkimettik emes uıymdar kóshbasshylary aldaǵy kezeńde de bılik pen úshinshi sektor arasyndaǵy tyǵyz qarym-qatynasty saqtap, damyta túsedi dep senemin, - dedi Erqanat Nurbapauly.
Forýmda óńirdegi azamattyq qoǵamnyń damýy men órkendeýine qosqan úlesi úshin birneshe qoǵamdyq birlestikter tóraǵalary men qoǵam belsendileri oblys ákiminiń Qurmet gramotasymen jáne Alǵys hattarymen marapattaldy.
Jıyn barysynda uıym belsendileri ózara pikir almasty. Olar qoǵamdyq birlestikterdiń jumysyna jıi taldaý jasap, monıtorıng júrgizip otyrý qajet ekenin basa aıtty. Memleket pen azamattyq qoǵam arasyndaǵy qarym-qatynasty nyǵaıtyp, ortaq isti áriptestik negizde atqarý kerektigin de sóz etti.
Bıyl forýmǵa alǵash ret aýyldyq okrýg ákimderi qatysty. Uıymdastyrýshylardyń aıtýynsha, bul aýyldaǵy úkimettik emes uıymdardyń dárejesin kóterip, birlese eńbek etýge sep bolady.
