Memlekettiń mıllıardtaǵan qarjysyn talan-tarajǵa salǵan eks-depýtat aıyppul tólep, abaqtydan shyqty
AQTÓBE. QazAqparat - Aqtóbede jolaýshylar tasymaly úshin memlekettik tapsyrysty oryndaǵan eks-depýtat Meıirjan Óndirgenov bir jyldan soń túrmeden shyqty.
Onyń jaza merziminiń tórtten bir bóligi qysqartylyp, keıin aıyppulǵa aýystyryldy, dep habarlaıdy QazAqparat tilshisi.
Aqtóbedegi «Emshan» kompanııasynyń dırektory Meıirjan Óndirgenov jolaýshylar tasymalyna bólingen mıllıardtardy talan-tarajǵa salǵany úshin ótken jyly sottalǵan bolatyn . Aıyptaý qorytyndysyna súıensek, ol 4,5 mıllıard teńgeni jymqyrǵan. Іs bir jylǵa jýyq ýaqyt boıy tergelip, eks-depýtat Meıirjan Óndirgenov birneshe qorǵaýshy jaldady. Prokýror sottan M.Óndirgenovty 10 jylǵa, Erbol Ádilovti 8 jylǵa bas bostandyqtarynan aıyrýdy suraǵanymen, sot 2016 jyldyń 1 tamyzynda alǵashqysyn 4 jylǵa, sybaılasyn 3 jylǵa bas bostandyǵynan aıyrý týraly úkim shyǵardy. Bir jyl ótken soń sottalýshylar raqymshylyqqa ilikti.
«QR Táýelsizdiginiń 25 jyldyǵyna oraı raqymshylyq týraly» Zańyna sáıkes shyǵyndy tolyq tólegen sottalýshy jaza merziminiń tórtten birin qysqarta alady. Materıalǵa súıensek, Aqtóbe oblystyq Qylmystyq atqarý júıesi departamenti sottalýshy Meıirjan Óndirgenov pen Erbol Ádilovke jaqsy minezdeme bergen. Olar jazasyn óteý kezinde tártip buzbaǵan, memleketke keltirilgen shyǵyndy tolyq ótegen. Sottalýshylardyń tártibi jaqsarǵan. Osy jaıttar eskerilip, sottalýshylardyń raqymshylyq týraly usynystary qanaǵattandyryldy. №2 Aqtóbe qalalyq sotynyń sheshimimen Meıirjan Óndirgenov jáne Erbol Ádilovtiń jaza merzimi tórtten birge qysqartylyp, aıyppulǵa aýystyryldy. Prokýratýra sot sheshimimen kelisti. Qazirgi ýaqytta sot sheshimi kúshine endi»,- dep habarlady Aqtóbe oblystyq sotynyń baspasóz qyzmeti.
Aıta keteıik, Meıirjan Óndirgenov «Alaıaqtyq»,«Bas bostandyǵynan zańsyz aıyrý», «Qorqytyp alýshylyq», Qylmystyq jolmen alynǵan aqshany jáne (nemese) ózge múlikti zańdastyrý (jylystatý)», «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» baptary boıynsha aıyptaldy. Al Erbol Ádilov alaıaqtyq, qylmystyq top bolyp asa úlken mólsherde bótenniń múlkin jymqyrý, aldaý nemese senimdi teris paıdalaný jolymen bóten múlikke quqyqty ıemdený qylmysyn jasaǵany úshin sottaldy. Sot Ádilovti 3 jylǵa bas bostandyǵynan aıyrǵan bolatyn.
