Memlekettiń kásipkerlik qyzmetke qatysýy zańmen shekteledi - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettiń kásipkerlik qyzmetke qatysýyn shekteý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Aıta keterligi, Memleket basshysynyń tapsyrysyna sáıkes, qazirgi ýaqytta ekonomıkadaǵy memlekettik qatysýdy birte-birte tómendetý jáne álemdik praktıkada paıdalanatyn «jasyl paraqtar» prıntsıpteri engizilýde. Osyǵan oraı, zań jobasy «jasyl paraqtar» qaǵıdattaryn engizý jónindegi Elbasynyń tapsyrmasyn oryndaý maqsatynda ázirlengen.
«Bul qaǵıdattarǵa sáıkes, memlekettik kásiporyndar men memleketke tikeleı nemese janama qatysy bar kompanııalar sanynyń artýyn shekteý kózdeledi. Zań jobasy básekelestikti jetildirýge jáne jeke kásipkerlikti damytý úshin qolaıly jaǵdaılar jasaýǵa yqpal etetin normalardy engizýdi kózdeıdi. Olar memlekettiń kásipkerlikke qatysý úlesin qysqartýǵa jáne básekelestikti damytýǵa qolaıly jaǵdaılar jasaýǵa baǵyttalǵan», - deıdi qujat jóninde baıandaǵan depýtat Aıgúl Soloveva.
Tutastaı alǵanda, zań jobasynyń negizgi maqsaty bıznes qatysatyn ekonomıka salalaryna memlekettiń qatysýy úlesin shekteý úshin quqyqtyq negizderdi bekitý bolyp tabylady. Osy arqyly memlekettik aktıvterdi basqarý salasyndaǵy zańnama jetildiriledi.
Qujat normalaryna sáıkes, jańa memlekettik kásiporyndar men enshiles kompanııalar qurýǵa qatań shekteý engiziledi. Anyqtalǵan qaǵıdattarǵa qaramastan qurylǵan memlekettik kompanııalar jekeshelendirilip, monopolııalarǵa qarsy organdy kúsheıtý qarastyrylady. Buǵan baılanysty zań jobasynda monopolııaǵa qarsy organnyń taýarly naryqtaryn básekelestik ortaǵa berý úshin qyzmet túrlerin jáne memlekettik kompanııalardy anyqtaý turǵysynda jyl saıynǵy taldaý júrgizýdi bekitetin norma engiziledi. Sonymen qatar, arnaıy taldaý jasalyp, sonyń nátıjesinde Úkimetke básekelestik ortaǵa beriletin memlekettik kompanııalardyń jáne qyzmet túrleriniń tizbesi joldanady.
