Memlekettiń ınnovatsııalyq damýy kórsetkishin monıtorıngteý úlken mańyzǵa ıe - QR Statıstıka agenttigi
ALMATY. 6 sáýir. QazAqparat /Erbol Azanbek/ - Qazaqstannyń statıstıka agenttigi aldaǵy ýaqytta Qazaqstannyń ınnovatsııalyq damý kórsetkishin monıtorıngteýdi júzege asyrady.
Bul týraly búgin Almatyda bastalǵan «Ortalyq Azııadaǵy ǵylymı-tehnologııalyq ındıkatorlardy jetildirý» atty halyqaralyq semınar barysynda QR Statıstıka agenttigi tóraǵasynyń orynbasary Jaser Jarqynbaev aıtty.
Onyń aıtýynsha, elde «Qazaqstan 2030» damý strategııasynyń ekinshi kezeńi bastaldy. El úkimeti aldyna ekonomıkany jańartý men onyń ınnovatsııalyq damýyn qamtamasyz etý maqsaty qoıylǵan. Bul baǵytta «Ónimdilik-2020», «Investor-2020» baǵdarlamalary júzege asyrylýda. «Ónimdiliktiń arttyrylýy ekonomıkalyq ósimniń mańyzdy faktory bolyp sanalady, onsyz eldiń ınnovatsııalyq damýy múmkin emes. Bul baǵytta ınnovatsııalyq ǵylym men tehnologııa kórsetkishterin monıtorıngteý basymdylyqqa ıe», - dedi J.Jarqynbaev.
Agenttik tóraǵasy orynbasarynyń sózine qaraǵanda, qazirde agenttik aldynda QR Úkimetiniń ınnovatsııalyq salanyń damýy týraly aqparat jınaý jónindegi mańyzdy mindeti tur. «Bizdiń mindetimiz monıtorıng kórsetkishterin jınaý qana emes, sonymen qatar úkimetti álemdik sońǵy tendentsııalar men jańa ındıkatorlar týraly ýaqtyly aqparatpen qamtamasyz etip otyrý dep bilemiz», - dedi J.Jarqynbaev. Onyń aıtýynsha, agenttik bul baǵytta birqatar jumystardy bastaýda. Atap aıtqanda «Oslo», «Fraskatı» ádistemelerine negizdelgen kórsetkishter engizilmekshi.
