Memlekettiń ekonomıkalyq, qoǵamdyq jáne saıası ómirdegi róli jyldan jylǵa ósýde - saıasattanýshy Erlan Qarın
ALMATY. Mamyrdyń 12-si. QazAqparat /Erlik Erjanuly/ - Memlekettik jobalar men bastamalardy júzege asyrýǵa qatysýǵa qoǵamdyq uıymdar men azamattarǵa múmkindik berý kerek. Bul búgin Almatyda ótip jatqan VI Halyqaralyq PR forýmda aıtyldy,
dep habarlaıdy QazAqparat.
«Bul forýmnyń basty maqsaty - memlekettik qurylymdardyń azamattar men qoǵammen baılanysyn tıimdi ótkizýine arnalǵan. Memlekettiń ekonomıkalyq, qoǵamdyq jáne saıası ómirdegi róli jyldan jylǵa ósýde. Ásirese sońǵy 2 jylda daǵdarystyń esebinen memleket keıbir fýnktsııalardy óz qolyna aldy. Kóptegen sarapshylardyń pikirinshe, memleket pen bılik organdary sońǵy jyldary qoǵamǵa ózderiniń belgili bir basymdyqtaryn jetkizýge qatysty mehanızmderdi jetildirip, olardyń sanyn ulǵaıtýda. Ákimderdiń esep berýi, mınıstrlerdiń jeke blogtary, úkimet músheleriniń turaqty túrde ınternet konferentsııalar uıymdastyrýy - bul memlekettik bılik organdarynyń óz tarapynan jasalyp jatqan is-sharalardy jetkilikti túrde qoǵamǵa jetkizý nıeti. Biraq keıbir sarapshylardyń oılarynsha, memleket tarapynan belsendilik artqanymen bul is-sharalar tek birjaqty», deıdi saıasattanýshy Erlan Qarın. Onyń aıtýynsha, aldaǵy 10 jyldyqta memleket tarapynan jasalatyn aýqymdy modernızatsııalyq ózgerister jospary jarııalandy. Endigi másele ondaǵy basymdyqtardy is-júzine asyrý úshin memleket azamattardy, qoǵamdy qanshalyqty jumyldyra alatyny jóninde bolyp otyr. Sondyqtan bul formýda talqylanyp jatqan negizgi máseleler memlekettik organdardyń qoǵammen baılanys júıesi. Azamattardyń memlekettik jobalar men bastamalardy júzege asyrýǵa qatysty usynystary men pikirlerin bildirý mehanızmderiniń sapasy jóninde bolyp otyr. Sebebi maqsat gazet pen teledıdarda sıýjetter men maqalalar jarııalap qoıýmen qatar, azamattar men qoǵamdyq uıymdardy osy jobalarǵa qatysýǵa múmkindik berý kerek.
