Memlekettiń ekonomıkadaǵy ústemdigin azaıtý úshin saıası jiger kerek - Ser Sýma Chakrabartı
NUR-SULTAN. QazAqparat – QR Prezıdentiniń Ekonomıkalyq damý máseleleri jónindegi keńesshisi Ser Sýma Chakrabartı Qazaqstan ekonomıkasynyń áleýeti qaı salalarda joǵary ekenin atady, dep habarlaıdy QazAqparat tilshisi.
«Qysqasha jaýap bersek, memleket ekonomıkaǵa kıligýin shektep, bızneske kóbirek oryn qaldyrýy kerek dep oılaımyn. Bul turǵyda Úkimettiń 2021-2025 jyldarǵa arnalǵan jekeshelendirý jospary bar. Osy jospardy sapaly oryndasa, úlken serpilis bolar edi. Sóz joq, ekonomıkany ártaraptandyrýymyz kerek. Qazaqstan áý bastan sony kózdep keledi. Biraq munaı, gaz, taý-ken ónerkásibiniń úlesi áli de basym. Al aýyl sharýashylyǵy, týrızm, tasymal naryǵy, Eýropa men Qytaı arasyndaǵy strategııalyq jaǵdaıdy tıimdi paıdalaný baǵytynda úlken áleýet jatyr. Osy salalarǵa kóńil bólip, jańa ınvestorlar tartý kerek. Astana halyqaralyq qarjy ortalyǵyn kóbirek iske tartý kerek. Sońǵy úsh jylda Astana halyqaralyq qarjy ortalyǵy 6 mlrd dollar ınvestıtsııa tartty. Jaqynda sol ınvestorlar Qazaqstanǵa keledi. Bul naqty jetistik jáne osy baǵytta jyljı berýimiz qajet», - dedi ol «Ult múddesi» baǵdarlamasynda.
Onyń aıtýynsha, ekonomıka memlekettik ústemdikten jeke bastamaǵa ótýi úshin saıası jiger men tehnıkalyq saraptama, tıimdi menedjment, yntalandyrý jáne kótermeleý júıesi qajet.
«Ekonomıka naryqqa baǵdarlanǵan saıyn, naryq pen adamdar ózgeredi. Olar memleketke qaraǵanda naryqqa kóbirek senim artady. Memleket – retteýshi, «sýper qaharman». Tasada turyp tyndyrýy kerek. Sóıte turyp, naqty muqtajdyqtar men qajettilikterge jaýap berýge tıis. Prezıdentimiz osyndaı ustanymǵa bet aldy jáne ony bul iste qoldaýymyz kerek», - dedi Sýma Chakrabartı.
