Memlekettiń de, qoǵamnyń da ǵylymǵa kózqarasy jaqsaryp keledi - EUÝ professory
«Elimizdegi ǵalymdardyń eń úzdikterin anyqtap, olarǵa joǵary qurmet kórsetý - memleket saıasatynyń jarqyn kórinisi.
Bıylǵy Joǵary oqý ornynyń Úzdik oqytýshysy baıqaýy tuńǵysh ret aqparattyq júıe kómegimen ótkizildi. Bul baıqaýdyń ádil, obektıvti ótýine yqpal etti. Ǵalymdardyń ǵylymı eńbekterin baǵalaý krıterııleri jańartyldy, basymdyqtar durys anyqtaldy», - dedi U. Esenbekova QR Bilim jáne ǵylym mınıstrliginde ótken «Joǵary oqý ornynyń úzdik oqytýshysy» marapat rásiminde.
Onyń aıtýynsha, jyldan-jylǵa memlekettiń de, qoǵamnyń da ǵylymǵa degen kózqarasy jaqsaryp, qoldaýy kúsheıip keledi. Ǵalymdar qaýymdastyǵy bundaı saıasatty jaqsy sezinýde.
«Tsıfrlyq tehnologııalar, jasandy ıntellekt, kvant kompıýter sııaqty qubylystardy qazaq ǵalymdary zerttep, boljap, naqty usynystar daıyndaǵany durys dep oılaımyn. Osy baǵyttaǵy ǵylymı zertteýlerge erekshe kóńil bólinýi - ýaqyt talaby ekeni anyq. Búgingi Úzdik oqytýshy sııaqty baıqaýlar ǵalymdardyń shabytyn serpiltip, jańa zertteýler týǵyzady dep senemin», - deıdi professor.
Aıta keteıik, QR Bilim jáne ǵylym mınıstrliginde 2020 jyldyń «Joǵary oqý ornynyń úzdik oqytýshysy» ataǵyn alǵan ǵalymdardy marapattaý rásimi ótti. Úzdik oqytýshy ataǵyn alǵan ǵalymdarǵa Bilim jáne ǵylym mınıstri Ashat Aımaǵambetov sertıfıkattar men tósbelgiler tapsyrdy. E limizde 150 ustaz «Joǵary oqý ornynyń úzdik oqytýshysy» ataǵyn ıelendi.
