Memlekettiń damýy áıel azamattardyń qoǵamdyq belsendiligine tyǵyz baılanysty - B. Baıbek
Sondyqtan da, áleýmettik-ekonomıkalyq úderisterine áıel azamattary belsene aralasatyn el qaryshtap damıdy. Bul týraly búgin Almatyda Qazaq memlekettik qyzdar pedagogıkalyq ýnıversıtetinde «100 naqty qadam - Halyqtyq reformalar» taqyryby boıynsha ótken ǵylymı-praktıkalyq konferentsııa barysynda Almaty qalasynyń ákimi Baýyrjan Baıbek málimdedi.
«Eshbir memlekettik baǵdarlama, kez kelgen saıasat áıeldersiz oryndalmaıdy. Memlekettiń damýy áıel azamattardyń qoǵamdyq belsendiligine tyǵyz baılanysty. Óıtkeni, áıelder qaýymy - qoǵamnyń eń qýatty bóligi. Sondyqtan da, áleýmettik-ekonomıkalyq úderisterine áıel azamattary belsene aralasatyn el qaryshtap damıdy. Eń damyǵan elderde áıelderdiń bilimi, biliktiligi edáýir joǵary. Olar kásiporyndardy, memlekettik emes uıymdardy basqarady. Memlekettik basqarý sektorynda qyzmet atqarady. Bul zańdy qubylys», - dedi B. Baıbek.
Sonymen qatar, qala basshysy Ult jospary - 100 naqty qadamdy júzege asyrýmen qatar, Almaty qalasynyń 2020 jylǵa deıingi damý baǵdarlamasyn iske asyrýda áıelder qaýymyna úlken úmit artatyndyǵyn jetkizdi.
«Biz áıel azamattardyń qatysýynsyz qalamyzdyń tıimdiligin arttyra almaımyz. Qalanyń turaqty damýy óte mańyzdy másele. Búgingi tańda Almatynyń aýmaǵy eki esege ulǵaıdy. Jyl saıyn qala halqy 3 paıyzǵa artyp keledi. Sondyqtan, qala turǵyndarynyń belsene qatysýynsyz joǵary nátıjelerge qol jetkizý múmkin emes. Sol úshin de memleket tarapynan áıel azamattardyń bızneske kelýine barynsha qolaıly jaǵdaı jasalyp jatyr. Qazirgi tańda shaǵyn jáne orta bıznes salasyna beriletin nesıelerdiń 20 paıyzyn áıelder alady. Sáıkesinshe, qaladaǵy barlyq shaǵyn jáne orta bıznes sýbektileri men úkimettik emes uıymdardyń 30 paıyzyn áıelder basqaryp keledi. Bul qalanyń durys baǵytta damyp jatqandyǵynyń belgisi», - dedi B. Baıbek.
Konferentsııa jumysyna Qazaqstan Respýblıkasynyń Memlekettik hatshysy Gúlshara Ábdihalyqova, Qazaqstandaǵy BUU Damý baǵdarlamasynyń turaqty ókiliniń mindetin atqarýshy Altangerel Mýnhtýıa, sondaı-aq, QR Parlamenti Májilisiniń depýtattary, otandyq jáne halyqaralyq úkimettik emes uıymdardyń ókilderi qatysty.
Aıta ketelik, mańyzdy da aýqymdy konferentsııanyń plenarlyq jıynynda 15-ten asa baıandama jasaldy. Sonymen qatar, búgingi jıynda bes ınstıtýtsıonaldyq reformany sapaly iske asyrý, adamı kapıtaldy damytý jáne kásipker áıelderdiń Ult josparyn júzege asyrý aıasyndaǵy ınnovatsııalyq jobalaryna qoldaý kórsetý jáne taǵy basqa da máseleler talqylandy.
