Memlekettiń bıznesti baqylaý qyzmeti qysqarady – zań jobasy
ASTANA. QazAqparat - Qazaqstanda memlekettik organdardyń kásipkerlikti baqylaý qyzmeti qysqarady. Bul týraly búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine kásipkerlik qyzmetti retteýdi jetildirý máseleleri boıynsha ózgerister men tolyqtyrýlar engizý týraly» QR zańynyń jobasyn tanystyrǵan Ulttyq ekonomıka mınıstri Tımýr Súleımenov aıtty, dep habarlaıdy QazAqparat.
Onyń aıtýynsha, kásipkerlikti memlekettik baqylaý-qadaǵalaý qyzmeti reformalanady. Bul - zań jobasynyń eń basty baǵyty bolyp sanalady jáne memlekettik baqylaý jáne qadaǵalaý júıesin túbegeıli ózgertýdi kózdeıdi. Mundaı ózgertý jańa profılaktıkalyq baqylaý ınstıtýtyn engizýdi qarastyrady. Ol ákimshilik isti bastamaı, quqyq buzýshylyqtardyń profılaktıkasyn júrgizedi.
«Bul rette, osyndaı profılaktıkalyq baqylaý men qadaǵalaý nátıjeleri boıynsha óreskel buzýshylyqtar anyqtalǵan jaǵdaıda onyń joıylýyn qaıta tekserý maqsatynda jospardan tys tekserý júrgizýge memlekettik organnyń quqyǵy saqtalady. Osylaısha, biz qoǵamdyq sanany ózgertý boıynsha úlken qadam jasaımyz. Ol kásipkerlikpen áriptestik ózara qarym-qatynas jasaýǵa jáne qalyptasqan memlekettik baqylaý men qadaǵalaý júıesiniń tanymyn jáne tártibin túbegeıli ózgertýge múmkindik beredi. Atalǵan reforma búgin júrgiziletin qoǵamdyq sanany jańǵyrtý saıasatymen sáıkes keletindigi sózsiz», - dedi mınıstr.
Sonymen qatar ol mundaı shara kásipkerlerdiń negizgi qyzmetine kedergilerine baılanysty shyǵyndaryn jáne qysymdy, sybaılas jemqorlyqty azaıtýǵa múmkindik beredi.
«Sonymen birge, búgin bar bolǵan 144 saladan 20-sy jáne 544 baqylaý qyzmetinen 108-i alynyp tastalady. Olardy alyp tastaýdyń negizgi sebebi - qaıtalanýy jáne júzege asyrý kezinde tıimdiliktiń bolmaýy. Sondyqtan, tutynýshylardyń qaýipsizdigi tıisti deńgeıde qamtamasyz etiledi», - dedi Tımýr Súleımenov.
Munan bólek, mınıstr ýákiletti organdardyń Ákimshilik quqyq buzýshylyq týraly kodekstiń 47-baby boıynsha ákimshilik is qozǵaýyn kózdeıtin baptar men quzyretterdiń alyp tastalatyndyǵyn aıtty.
