Memlekettiń bızneske aralasýy zań júzinde shekteledi
Toqtala ketetin jaıt, Memleket basshysynyń tapsyrysyna sáıkes, qazirgi ýaqytta ekonomıkadaǵy memlekettik qatysýdy birte-birte tómendetý jáne álemdik praktıkada paıdalanatyn «jasyl paraqtar» prıntsıpteri engizilýde. Ondaı qaǵıdattarǵa sáıkes, memlekettik kásiporyndar men memleketke tikeleı nemese janama qatysy bar kompanııalar sanynyń artýyn shekteý kózdeledi.
Ulttyq ekonomıka mınıstri Erbolat Dosaevtyń aıtýynsha, tutastaı alǵanda, zań jobasynyń negizgi maqsaty bıznes qatysatyn ekonomıka salalaryna memlekettiń qatysýy úlesin shekteý úshin quqyqtyq negizderdi bekitý bolyp tabylady. «Memlekettik kompanııalarǵa enshiles qurylymdar qurýdan shekteý, ekonomıkanyń bıznes qatysatyn salalaryna memlekettiń qatyspaýy, kásiporyndardyń rólin kúsheıtý qajettiligi sezilip otyr. Bul rette zań jobasynyń negizgi maqsaty bıznes qatysatyn ekonomıka salalaryna memlekettiń qatysýy úlesin shekteý úshin quqyqtyq negizderdi bekitý bolyp tabylady. Osy arqyly memlekettik aktıvterdi basqarý salasyndaǵy zańnama jetildiriledi. Osyǵan oraı, zańdy jetildirý básekelestikti arttyra túsýge jáne jeke kásipkerliktiń jalpy damýyna yqpal etetin bolady», - dedi E.Dosaev.
Onyń sózine qaraǵanda, zań jobasymen jańa memlekettik kásiporyndar men enshiles kompanııalar qurýǵa qatań shekteý engiziledi. Anyqtalǵan qaǵıdattarǵa qaramastan qurylǵan memlekettik kompanııalar jekeshelendirilip, monopolııalarǵa qarsy organdy kúsheıtý kózdeledi. «Buǵan baılanysty zań jobasynda monopolııaǵa qarsy organnyń taýarly naryqtaryn básekelestik ortaǵa berý úshin qyzmet túrlerin jáne memlekettik kompanııalardy anyqtaý turǵysynda jyl saıynǵy taldaý júrgizýdi bekitetin norma engiziledi. Taldaýdyń nátıjesinde Úkimetke básekelestik ortaǵa beriletin memlekettik kompanııalardyń jáne qyzmet túrleriniń tizbesi joldanady», - deıdi E.Dosaev.
Qujat birinshi oqylymda maquldandy.