Memlekettiń ár tıyny nátıjeli jáne tıimdi jumsalý kerek - Nurlan Nyǵmatýlın

ASTANA. QazAqparat - Búgin Májilis tóraǵasy Nurlan Nyǵmatýlınniń tóraǵalyǵymen ótken jalpy otyrysta Úkimettiń jáne Esep komıtetiniń 2017 jylǵy respýblıkalyq bıýdjettiń atqarylýy týraly esepteri qaraldy, dep habarlaıdy QazAqparat.

«Elbasymyz aıtqandaı, «memlekettiń aqshasy - ol halyqtyń aqshasy». Sondyqtan, onyń árbir tıyny nátıjeli jáne tıimdi jumsalý kerek. Bul bizdiń jumysymyzdyń eń negizgi baǵyttarynyń biri. Osy jolda búgin ózimiz kýá bolǵandaı, atqarylyp jatqan jumystar óte kóp. Biraq ta, keıbir kemshilikter áli de bar. Onyń barlyǵy búgingi talqylaý kezinde aıtyldy. Sonymen birge, depýtattarymyz kóptegen usynystardy da jetkizdi. Aldaǵy jumysta Úkimet te, Esep komıteti de osy usynystardy eskerý qajet dep esepteımiz, - dedi Nurlan Nyǵmatýlın.

Májilis tóraǵasy atap ótkendeı, talqylaý barysynda depýtattar Elbasynyń bıýdjet qarjylaryn josparly jumsaýǵa baılanysty tapsyrmasyn basshylyqqa aldy.

Atap aıtqanda, jalpy otyrys barysynda esepti talqylaý birneshe saǵatqa sozyldy. Osy rette ótken jylǵy bıýdjettiń atqarylýynyń jetistikteri men kemshilikteri jan-jaqty aıtyldy.

Budan buryn habarlanǵandaı, Nurlan Nyǵmatýlın Qazaqstannyń mamandary atqara alatyn jumystarǵa sheteldik keńesshilerdi shaqyrtýdy doǵarý kerektigin aıtty. 

Sonymen qatar QR Qarjy mınıstri Baqyt Sultanov málim osy jyldyń tamyz aıynda Blockchain tehnologııasyn qoldaný arqyly jańa jobanyń tusaýkeseri ótetinin jetkizdi.