Memlekettiń 5 mln. teńgesin jymqyrǵan mektep dırektory shartty túrde sottaldy
ASTANA. 11 qazan. QazAqparat - Memleket bıýdjetine 5 mln. teńge kóleminde shyǵyn keltirgen Astanadaǵy mektep dırektory shartty túrde sottaldy. Bul týraly búgingi semınar-dáriste QR Ekonomıkalyq jáne sybaılas jemqorlyqqa qarsy kúres agenttiginiń Astana qalasy boıynsha departamentiniń ókili, maıor Andreı Grechko málim etti.
Onyń aıtýynsha, ótken jyly laýazymdy tulǵanyń asa iri kólemde aqsha urlaý faktisi boıynsha Astanadaǵy «№39 keshki mektep» memlekettik mekemesiniń dırektory Qymbat Ysqaqovaǵa qatysty qylmystyq is qozǵalǵan bolatyn. «Ol oqý saǵattaryn artyq jazyp, aqshany muǵalimderdiń jalaqysyna aýdaryp turǵan. Olar bolsa, ár aıdyń sońynda bank kartochkasynan aqshany alyp, belgili bir bóligin basshysyna berip otyrdy. Budan basqa, dırektor óziniń týǵan-týystaryn mektepke jumysqa alǵan. Alaıda olardyń birde-bireýi ózine júktelgen qyzmetti atqarmady. Sóıtip, Q.Ysqaqova memleketke 5 mln. teńge kóleminde shyǵyn keltirdi. Bul aqsha qaıtaryldy. Al qylmysker óz kinásin moıyndap, shartty túrde bas bostandyǵynan aıyryldy», - deıdi A.Grechko.
