Memlekettik josparlaý júıesin jetildirý sharalary daıyndalýda - Erulan Jamaýbaev
«Ótken jyly bıýdjet shyǵystary esebinen 344 bıýdjettik baǵdarlamany qarjylandyrý arqyly 53 strategııalyq baǵyt júzege asyryldy. Strategııalyq josparlardyń 264 ındıkatoryna qol jetkizildi. 13 memlekettik baǵdarlama qarjylandyryldy. Sonyń ishinde, «Nurly jol» memlekettik baǵdarlamasy aıasynda myńdaǵan turaqty jumys orny ashyldy. Tranzıttik júk kólemi 20 mln tonnaǵa jýyqtady. 115 shaqyrym jylýmen jabdyqtaý, sýmen jabdyqtaý jáne sý burý jelileri salyndy jáne rekonstrýktsııalandy», - dedi mınıstr.
Onyń sózine qaraǵanda, «Nurly jer» baǵdarlamasy aıasynda 19 myńnan astam páter halyqtyń áleýmettik osal toptaryna, kópbalaly otbasylarǵa jáne jumys isteıtin jastar úshin paıdalanýǵa berildi. «Eńbek» baǵdarlamasy baǵytynda 22 myń jas tehnıkalyq kásiptik oqýmen qamtyldy, 19 myń adam mıkrokredıt pen grant aldy. Alǵash ret shamamen 6 myńǵa jýyq jas jeke isin ashty jáne keńeıtti.
«Jalpy memleket óziniń áleýmettik mindettemelerin tolyq oryndady. Alaıda, memlekettik josparlaý júıesinde birqatar máseleler de bar. Bul týraly Úkimettiń esebine Esep komıtetiniń qorytyndysynda qamtyldy. Osyǵan baılanysty memlekettik josparlaý júıesin jetildirý úshin Úkimette tıisti sharalar daıyndalýda. Atap aıtqanda, memlekettik baǵdarlamalar men strategııalyq josparlardyń nysanaly ındıkatorlaryn ózgertýge tyıym salynatyn bolady. Memlekettik baǵdarlamalarda qarjylyq qoldaý alýshy kásipkerlerdiń qarsy mindettemeleriniń túrleri de qarastyrylady», - dedi E. Jamaýbaev.
Onyń atap ótýinshe, Úkimet Májilistiń qaraýyna bıýdjet zańnamasyna ózgerister men tolyqtyrýlar engizý týraly zań jobasyn engizedi. Bul jobada strategııalyq jáne bıýdjettik josparlaý júıesiniń mehanızmderin qaıta qaraý, bıýdjettik ınvestıtsııalardyń boljamdyq ekonomıkalyq tıimdiligin baǵalaý normasyn engizý, kásipkerlerge memleket tarapynan qoldaý sharalaryn jetkizetin operatorlarǵa qazynashylyq organdarda arnaıy shot ashý qarastyrylǵan. Barlyq usynylǵan ózgerister bıýdjettik protsesti jetildirýge baǵyttalǵan.
