Memlekettik josparlaý júıesin túbegeıli ózgertý qajet – Memleket basshysy
«Prezıdent Ákimshiligi basty «saıası shtab» retinde memleketti áleýmettik-ekonomıkalyq damytýdyń strategııalyq baǵyttaryna, ishki jáne syrtqy saıasat, qorǵanys jáne qaýipsizdik, quqyq jáne kadr saıasaty máselelerine barlyq kúsh-jigerin jumyldyrady. Memlekettik apparatty bıýrokratııadan aryltý jolyndaǵy júıeli jumys jalǵasa beredi. Memlekettik josparlaý júıesin túbegeıli ózgertý qajet. Bizge onyń meılinshe shaǵyn jáne qolaıly bolǵany mańyzdy», - dedi Memleket basshysy.
Prezıdent tapsyrmalardyń oryndalýyn baqylaý jáne baǵalaý jumysyn da qaıta qaraý qajettigin basa aıtty.
«Qazir qoǵamda jańa ádis-tásilderge, jańa ıdeıalarǵa, jańa kadrlarǵa degen suranys asa joǵary. Sondyqtan saıası memlekettik qyzmetshilerdiń rezervi qurylady, sonyń arqasynda «qosymsha kadrlar toby» qalyptasady. Qazir kadr tapshylyǵy ózekti másele bolyp turǵan kezde mundaı qadam óte mańyzdy. Joǵary laýazymǵa ıe bolǵysy keletinder kóp, biraq olardyń biliktiligi tıisti talapqa saı kelmeıdi. Demek, kadr máselesin mindetti túrde qolǵa alýymyz kerek, sapaly mamandar tárbıeleý qajet. Bul rette saıası partııalardyń kadrlyq áleýetin de paıdalanǵan jón. Aımaqtaǵy atqarýshy bıliktiń sheshim qabyldaý isine azamattardyń tikeleı qatysý múmkindigin birtindep arttyrý da mańyzdy. Aýyl, kent jáne aýyldyq okrýg ákimderin turǵyndar ózderi saılaı bastaǵanyna eki jyldan asty. Sodan beri aýyldyq deńgeıdegi ákimderdiń tórtten úshi saılandy. Endi aýdan jáne oblystyq deńgeıdegi qala ákimderin saılap kóremiz», - dedi Qasym-Jomart Toqaev.
