Memlekettik joǵary oqý oryndary derbes kommertsııalyq emes uıymdarǵa aınalady - Bilim jáne ǵylym mınıstri Baqytjan Jumaǵulov
ATY. 22 sáýir. QazAqparat /Názıra Eleýhan/ - Joǵary oqý oryndaryna akademııalyq erkindik pen derbestik beriledi.
Bul - bilim berý, ǵylymı, qarjylyq, halyqaralyq jáne basqa da qyzmetterdi júzege asyrýdaǵy derbestik. Osy model boıynsha «Nazarbaev Ýnıversıteti» damýda. Budan bylaı ondaǵy pysyqtalǵan tetikter basqa joǵary oqý oryndaryna da taratylatyn bolady. Memlekettik joǵary oqý oryndary derbes kommertsııalyq emes uıymdarǵa aınalady. Bul týraly búgin Almatyda S.Asfendııarov atyndaǵy QazUMÝ-de ótken konferentsııada Bilim jáne ǵylym mınıstri Baqytjan Jumaǵulov aıtty.
Onyń aıtýynsha, mundaı tásil álemdik praktıkada kóptep kezdesedi. «Bul tásil árbir joǵary oqý ornynyń «ózindik sıpatqa» ıe bolyp, álemdik arenada derbes tanylýyna jaǵdaı týǵyzady», - dedi mınıstr.
Baqytjan Jumaǵulovtyń aıtýynsha, kelesi jyldan bastap memlekettik aralyq baqylaý alynyp tastalady. «Ol bilim sapasyn arttyrýǵa yqpal etip otyrǵan joq, tek formaldy protsedýra túrinde ótip júr», - dedi ol.
Onyń aıtýynsha, aldaǵy ýaqytta, Memleket basshysynyń tapsyrmasyna sáıkes joǵary oqý oryndarynyń ınnovatsııalyq qyzmetikúsheıtiledi. «Qazaq ulttyq medıtsınalyq ýnıversıteti óz salasy boıynsha ınnovatsııalyq qyzmette kósh bastap keledi. Sondyqtan, osy oqý ornyna bul baǵytta damýy úshin jan-jaqty qoldaý kórsetemiz», - dep atap ótti ol.
Ol sonymen qatar: «Osy jyly biz úlken mańyzdy qadam jasadyq dep oılaımyn. Joǵary oqý oryndaryn joǵary bilimniń álemdik trendine sáıkes keltirip, akademııalyq mobıldikke jol ashtyq. Bul úshin birinshi kezeńge alǵash ret 200 mln. teńge bólinip otyr. Budan bylaı memleket esebinen ulttyq ýnıversıtet stýdentteri semestr boıy eýropadaǵy úzdik joǵary oqý oryndarynda oqı alady. Al, basqa aımaqtyq joǵary oqý oryndarynyń stýdentteri bizdiń Ulttyq ýnıversıtetterde mobıldi túrde bilim alady», - dedi.
Onyń aıtýynsha, elimizde shetelden shaqyrylatyn bilikti oqytýshylardyń sany da artyp keledi. «Biz buryn, 2005 jyly tek qana 40sheteldik professordy tartsaq, osy jyly olardyń sany 300-ge jetti. Eń bastysy, olardyń árqaısysy uzaqtyǵy 10 aıdan jumys isteıtin bolady. Osyǵan baılanysty qarastyrylǵan qarajat 265 mln. teńgeden osy jyly 2,5 mlrd. teńgege, ıaǵnı 10 esege ósti», - dedi ol.
Mınıstr sonymen qatar, «elimizde stýdentterdiń de turmys jaǵdaıy nazardan tys qalyp otyrǵan joq», - dep atap ótti. «Úkimettiń tapsyrmasy boıynsha «Stýdenttik baspana» baǵdarlamasyn ázirledik. Bul - óte mańyzdy másele, ásirese Almaty qalasy úshin. Osy baǵdarlamany iske asyrý 2015 jyly stýdentterdi jataqhanamen 80%-ǵa deıin qamtamasyz etýge múmkindik beredi», -dedi ol.
