Memlekettik jer kadastrynyń avtomattandyrylǵan aqparattyq júıesin iske qosý 2011 jyldyń aıaǵyna josparlanyp otyr - Ó.Ózbekov
ASTANA. 11 mamyr. QazAqparat /Marlan Jıembaı/ - Memlekettik jer kadastrynyń avtomattandyrylǵan aqparattyq júıesin iske qosý 2011 jyldyń aıaǵyna josparlanyp otyr.
Bul týraly búgin Jer resýrstaryn basqarý agenttiginiń tóraǵasy Ómirzaq Ózbekov QR Parlamenti Senatynyń depýtattarymen kezdesý barysynda aıtty.
Onyń atap ótýinshe, 2002 jyldan bastap memlekettik jer kadastrynyń avtomattandyrylǵan aqparattyq júıesi engizile bastaǵan. Ótken jyly atalǵan júıe tájirıbelik túrde iske qosyldy. Qazirgi ýaqytta júıeniń aqparattyq qaýipsizdik talaptaryna saı bolýyna qatysty attestatsııalaý jumystaryna daıyndyq júrgizilýde jáne de aqparattyq júıesiniń tıimdiligine qatysty aýdıt belgilendi.
«Jalpy memlekettik jer kadastrynyń avtomattandyrylǵan aqparattyq júıesin ónerkásiptik iske qosý bıylǵy jyldyń aıaǵyna deıin ótkizý josparlanyp otyr», - dedi Ó.Ózbekov.
Atalǵan júıeniń respýblıkalyq bazasynda sáıkestendirý qujattary rásimdelgen jer ýchaskeleri týraly 4 trıllıonǵa jýyq málimetter bar. Qarjy mınıstrligi salyq komıtetiniń salyq tóleýshiler men salyq salý nysandarynyń tizilimi aqparattyq júıesine 3,7 mıllıonnan astam málimetter berildi. Sonymen qatar avtomattandyrylǵan jer kadastyryndaǵy e-Úkimet shlıýzine meken-jaı regıstri, jyljymaıtyn múlik regıstri, memlekettik bazalyq derekterdiń aqparattyq júıelerine berilgen ortalyqtandyrylǵan tetigi júzege asyryldy.
