Memlekettik-jekeshelik seriktestik negizinde qolǵa alynǵan jobalar kóp pe

ASTANA. QazAqparat - QR Ulttyq ekonomıka mınıstrliginiń bıýdjettik ınvestıtsııalar jáne memlekettik-jekeshelik seriktestik departamenti dırektorynyń orynbasary Nurlan Shoqparbaevtyń aıtýynsha, aldaǵy ýaqytta osy saladaǵy jobalardyń ortaq tizimin jasap, biryńǵaı portalda jarııalaý josparlanyp otyr, dep habarlaıdy QazAqparat tilshisi.

«Búginde memlekettik-jekeshelik seriktestik boıynsha 31 joba boıynsha kelisimsharttar rásimdeldi. Atalǵan jobalardyń jalpy somasy 21,2 mlrd teńgeni qurap otyr. Konkýrstarǵa taǵy 11 mlrd teńgeniń 16 jobasy qatysyp jatyr. Budan bólek, aımaqtarda 250 joba, al respýblıkalyq deńgeıde 22 joba pysyqtalýda. Alaıda onyń barlyǵy áli qolǵa alynǵan joq. Ázirshe, ol jobalardyń tujyrymdamasy talqylanyp jatyr», - deıdi Nurlan Shoqbarbaev.

Onyń aıtýynsha, aldaǵy ýaqytta memlekettik-jekeshelik seriktestik jobalary boıysha biryńǵaı portaldy qurý josparlanyp otyr. Sonyń arqasynda kez kelgen ınvestor respýblıka boıynsha qolǵa alynyp jatqan jobalardy kóre alady. Budan bólek, jobalardy irikteý men saraptaý merzimin barynsha qysqartý jumysy jalǵasa beredi. «Ótken jyly biz 7 tıptik qujatty bekittik. Ústimizdegi jyly naýryzdyń aıaǵyna deıin taǵy úsh bekitýdi kózdep otyrmyz. Jyldyń sońyna deıin ol qujattardyń sany artady dep oılaımyz. Osynyń arqasynda jobaǵa saraptama jasaý merzimin barynsha qysqartýǵa múmkindik bar. Saraptama kezinde jobanyń tujyrymdamasy ǵana qaralady. Qalǵany tıptik úlgide óte beredi. Ótken jyly bekitilgen tıptik qujattar qazir Ádilet mınıstrliginiń qaraýynda jatyr. Aldaǵy ýaqytta kúshine enedi dep kútip otyrmyz», - deıdi Shoqbarbaev.

Aıta keteıik, búginde memlekettik-jekeshelik áriptestik negizinde kásipkerler jańa ǵımarat salý, ıa bolmasa, eski nysandy jańǵyrtý arqyly áleýmettik qyzmet kórsetý kásibin jolǵa qoıa alady. Ondaı tájirıbe balabaqshalardy ashý salasynda keńinen taraǵan. Bıznes óz aqshasyn salǵannan keıin sýbsıdııa jáne taǵy basqa ótemaqylardyń esebinen óz shyǵyndaryn aqtaı alady. Oǵan qosa, aqyly qyzmetterdi de kórsetýge múmkindik bar. Osyǵan baılanysty «Memlekettik-jekeshelik áriptestiginiń qazaqstandyq ortalyǵy» AQ kásipkerlerge tegin konsýltatsııalar berip keledi.