Memlekettik-jekeshelik seriktestik negizinde 63 joba júzege asyrylýda
ASTANA. QazAqparat - Qazaqstanda memlekettik-jekeshelik seriktestik negizinde 63 joba júzege asyrylýda. Bul týraly búgin Úkimet úıindegi baspasóz máslıhatynda «Qazaqstandyq memlekettik-jekeshelik áriptestik ortalyǵy» AQ basqarmasy tóraǵasynyń orynbasary Talǵat Mataev aıtty, dep habarlaıdy QazAqparat.
Onyń aıtýynsha, búgingi tańda jalpy respýblıka boıynsha 547 joba túrli deńgeıde júrgizilýde. Atalǵan jobalardyń jalpy somasy 1,8 trln teńgeni quraıdy. Onyń ishinde jalpy somasy 952 mlrd teńgeni quraıtyn 18 joba respýblıkalyq, al 800 mlrd teńgeni quraıtyn qalǵan 529-y aımaqtyq deńgeıinde júzege asyrylýda.
«Qazirgi ýaqytta aımaqtarda 116 kelisimshartqa qol qoıylǵan. Respýblıkalyq deńgeıdegi 18 jobanyń úsheýi iske asyrylyp jatyr. Olar: 2006-2007 jyldan júzege asyrylyp jatqan Aqtaý qalasyndaǵy halyqaralyq áýejaı termınaly, Soltústik Qazaqstan men Aqtóbe oblysyna tartylǵan elektr jelileri jáne Shar-Óskemen temirjoly konssetsııalyq jobalar», - dedi Mataev.
Basqarma tóraǵasy orynbasarynyń aıtýynsha, kelisimshartyna qol qoıylǵan 116 jobanyń búginde jalpy somasy 70 mlrd teńgeni quraıtyn 53-i júzege asyrylǵan.
«Qalǵan 63 joba júzege asyrylýda. Jobalardyń basym bóligi negizinen bilim salasynda. Odan keıin densaýlyq saqtaý, dene shynyqtyrý jáne sport, aýyl sharýashylyǵy, jeke turǵyn úı-kommýnaldyq sharýashylyǵy salalarynda iske asyrylyp jatqan kóptegen joba bar», - dedi ol.
