Memlekettik-jekeshelik seriktestik: Aqmola oblysynda 50-den astam joba júzege asyrylýda
KÓKShETAÝ. QazAqparat - Aqmola oblysynda memlekettik-jekeshelik seriktestik sheńberinde 50-den astam joba júzege asyrylýda. Bul týraly Aqmola oblystyq kásipkerlik jáne ónerkásip basqarmasy basshysynyń orynbasary Doshan Ámirenov aıtty, dep habarlaıdy QazAqparat tilshisi.
Onyń aıtýynsha, memlekettik-jekeshelik seriktestiginiń tetigi arqyly jobalardy júzege asyrý kezinde ekonomıkanyń kóptegen salasy tasada qalmaıdy. Degenmen, aqmolalyq kásipkerlerdiń kóbi memlekettiń bilim jáne densaýlyq saqtaý salasymen áriptestik ornatýdy qalaıdy. Osy kúni oblysta memlekettik-jekeshelik seriktestik arqyly júzege asyrylýy kózdelgen jobalar tizimi jasaldy. Buǵan 19,5 mıllıard teńgeniń 52 jobasy enip otyr.
«Búgingi tańda bul baǵyttaǵy kelisim-shartqa jekemenshik seriktestikteri qol qoıdy. Segiz joba boıynsha memlekettik mindetteme qabyldandy. Sonyń ishinde Tselınograd aýdanynyń ortalyǵy - Aqmol eldi mekeninde 280 oryndyq bala baqsha qurylysyn júrgizý, Stepnogorsk qalasyna bala baqsha salý qarastyrylǵan. Býrabaı aýdanynda densaýlyq saqtaý nysandarynyń qurylysyn basqarý jekemenshik qolyna beriledi. Osy aýdandaǵy Oqjetpes aýylynda bala baqsha ashylady. Sondaı-aq, Kókshetaý qalasynyń irgesindegi Krasnoıar selosyndaǵy balabaqshanyń qurylysy da jekemenshiktiń qolǵa beriledi», - deıdi Doshan Ámirenov.
Sondaı-aq, basqarmasy basshysy orynbasarynyń aıtýynsha, munda úsh 32 páterlik turǵyn úı qalpyna keltiriledi. Segiz joba boıynsha konkýrs jarııalandy. Bul baǵytta turaqty jumys júrgizilýde.
Memlekettik jekemenshik seriktestiginiń jobalaryna keńes berý maqsatynda «Esil» áleýmettik kásipkerlik» Ulttyq kompanııasy» aktsıonerlik qoǵamy janynda «Óńirlik memlekettik-jekemenshik seriktestiginiń ortalyǵy» JShS qurylǵan.
