Memlekettik-jekeshelik áriptestiktiń qatysatyn aýqymy keńeıtiledi
ASTANA. QazAqparat - Búgin QR Parlamenti Senaty Agrarlyq máseleler, tabıǵatty paıdalaný jáne aýyldyq aımaqtardy damytý komıtetiniń keńeıtilgen otyrysy ótti. Onda senatorlar «Memlekettik-jekeshelik áriptestik» týraly zań jobasyn talqylady.
QR Ulttyq ekonomıka vıtse-mınıstri Marat Qusaıynovtyń aıtýynsha, qujatta memlekettik-jekeshelik áriptestiktiń qatysýshylar aıasyn jáne qoldanylý salalaryn retteý, memlekettik-jekeshelik áriptestiktiń kelisimsharttyq nysandaryn keńeıtý, ınstıtýttyq memlekettik-jekeshelik áriptestik máselelerin retteý sharalary qamtylyp otyr. Budan bólek, zań jobasymen memlekettik-jekeshelik áriptestik sharttarynyń qurylymyn aıqyndaý, jeke qarjylyq bastamany engizý, memlekettik-jekeshelik áriptestik jobalaryna kvazımemlekettik sektor sýbektileriniń qatysý nysanyn aıqyndaý usynylady.
«Máselen, bilim berý, densaýlyq saqtaý jáne avtojoldar salý sııaqty negizgi salalarmen qatar zań jobasy memlekettik-jekeshelik áriptestikti ekonomıkanyń barlyq salalarynda damytýdy boljaıdy. Degenmen, tek Memleket basshysynyń tıisti jarlyǵymen shekteletin tyıymdar jeke nysandar boıynsha ǵana salynady. Qarjylyq uıymdardy, ulttyq sala operatorlaryn jáne «Atameken» ulttyq kásipkerler palatasyn qosa alǵanda memlekettik-jekeshelik áriptestik qatysýshylarynyń aıasy zańnama túrinde anyqtalady», - dedi vıtse-mınıstr.
Onyń sózine qaraǵanda, memlekettik-jekeshelik áriptestiktiń kelisimsharttyq nysandaryn ómirlik tsıkl kelisimsharttaryn, ǵylymı-zertteý men tájirıbelik-konstrýktorlyq jumystarǵa arnalǵan kelisimsharttardy, servıstik kelisimsharttardy jáne lızıngtik tetikterdi engizý arqyly eleýli túrde keńeıtý qarastyrylady. Budan bólek, zań jobasy aıasynda ınstıtýtsıonaldyq memlekettik-jekelik áriptestikti júzege asyrý tetikteri aıqyndalyp, ol arqyly memleket pen jekeshe áriptesterdiń arasynda birlesken kásiporyndar qurý máselesi retteledi. Al osy baǵyttaǵy kontsessııalarda qoldanylǵan memelkettik qoldaý sharalary memlekettik-jekeshelik áriptestiktiń barlyq jobalaryna birdeı qoldanylatyn bolady.
Zań jobasyn talqylaýdan soń senatorlar qujatty palatanyń jalpy otyrysyna shyǵarý týraly sheshim qabyldady.
