Memlekettik-jekeshelik áriptestik jobalarynyń jańa bazasy qurylady
ASTANA. QazAqparat - Memlekettik-jekeshelik áriptestik ortalyǵynda josparlanǵan jobalar týraly aqparat taratatyn jańa baza qurylady. Bul týraly búgin Ortalyq kommýnıkatsııalar qyzmetinde ótken «Memlekettik-jekeshelik áriptestik aıasyndaǵy memleket pen bıznes arasyndaǵy dıalog» atty otyrysta Memlekettik-jekeshelik áriptestik ortalyǵynyń vıtse-prezıdenti Aıdos Kóbetov málimdedi.
«Bizde josparlanǵan jobalarǵa qatysty jańa baza qurylady. Onda tutas Qazaqstan boıynsha memlekettik-jekeshelik áriptestiktiń josparlanǵan jobalary týraly aqparat berilip otyrady. Bul Qazaqstandaǵy jáne shet elderdegi barlyq ınvestorǵa yńǵaıly bolmaq», - dep, Aıdos Kóbetov sheteldik ınvestorlar men jergilikti ınvestorlarǵa qoıylatyn talaptardyń birdeı ekenin, zańnamada eshqandaı artyqshylyq joq ekenin atap ótti.
Sondaı-aq, MJÁ ortalyǵynyń vıtse-prezıdenti Aıdos Kóbetov memlekettik-jekeshelik seriktestik pen tenderdiń aıyrmashylyǵyn túsindirip berdi.
«Memlekettik satyp alý kezinde qarajatty memleket tóleıdi. Konkýrs jarııalanyp, tenderdi utyp alǵan jeke kásipker nysandy bir jylda turǵyzyp, memleketke tapsyrady. Osy jerden jeke kásipkerdiń barlyq mindetteri aıaqtalady. Ári qaraı salynǵan nysannyń paıdalanylýy, saldarynyń qandaı bolary belgisiz. Tender aınalasynda kóptegen jaǵdaılar oryn alyp jatady, nysandy turǵyzǵan kompanııany izdep tappaı qalǵandar bar. Al memlekettik-jekeshelik áriptestiktiń ereksheligi sol, nysandy salǵan kompanııa eksplýatatsııaǵa da qatysty birqatar mindetterdi atqarady. Eger balabaqshany tolyǵymen jeke kásipkerge berer bolsaq, kompanııa balabaqshany salyp, memleket balansyna ótkizedi jáne ári qaraı balabaqshany eksplýatatsııalaıdy. Balalardy tárbıeleý jumysy, ǵımaratqa qatysty máselelermen aınalysady. Sondaı-aq, tenderde memleket aqsha salatyn bolsa, memlekettik-jekeshelik áriptestikte qarajatty kásipker quıady. Ony memleket keıin qaıtaryp beredi. Bul jerde bıýdjetti jeńildetý protsesi kózdelgen», - dedi Aıdos Kóbetov.
Aıta keteıik, Memleket basshysy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty óz Joldaýynda memlekettik-jekeshelik áriptestiktiń ártúrli nysanyn belsendi qoldanýǵa shaqyrdy. Búginde jalpy somasy 1,5 trln teńge bolatyn memlekettik-jekeshelik áriptestiktiń 354 jobasy josparlaýdyń túrli satysynda tur. Onyń 335-i - óńirlik jobalar. Sońǵy bir jarym jylda 31,1 mlrd teńgege 43 joba boıynsha kelisimshart jasalǵan. Atap aıtqanda, respýblıka aýmaǵynda 21 balabaqsha, 7 servıstik-daıyndaý ortalyqtary, 6 sport kesheni, 5 medıtsınalyq mekeme, 2 turǵyn úı, 1 mektep-ınternat jáne 1 blok-modýldik qazandyq memlekettik-jekeshelik áriptestik tártibimen jumys isteıdi. MJÁ boıynsha belsendi óńirler qatarynda Qostanaı, Aqtóbe, Almaty oblystary bar.
