Memlekettik-jekeshelik áriptestik arqyly myńǵa jýyq nysan salynady
ASTANA. QazAqparat - Elimizde memlekettik-jekeshelik áriptestik arqyly bir myńǵa jýyq nysan salý josparlanǵan. Bul týraly búgin Senat depýtattarymen kezdesý barysynda QR Ulttyq ekonomıka birinshi vıtse-mınıstri Rýslan Dálenov aıtty, dep habarlaıdy QazAqparat tilshisi.
"2015-2019 jyldary aralyǵynda shamamen 1,4 trln teńgege 564 nysannyń kelisimsharty jasaldy. Onyń 555-i jergilikti, al 9-y respýblıkalyq deńgeıdegi nysandar. Sonymen qatar 1,5 trln teńgege myńnan astam nysannyń kelisimshartyn daıyndaý júrgizilip jatyr", - dedi ol.
Onyń aıtýynsha, memlekettik-jekeshelik áriptestik arqyly júzege asyrylǵan jobalardyń basym bóligi energetıka men turǵyn úı-kommýnaldyq salasyna tıesili. Sonymen qatar balabaqsha, mektep salýda da MJÁ durys jolǵa qoıylǵan. Osy rette ol MJÁ arqyly salynǵan jobalardyń biri Úlken Almaty aınalma avtomobıl jolyna toqtalyp ótti.
"Bul jolǵa 20 jyl boıy qyzmet kórsetiletin bolady. Eger ony bıýdjet arqyly júzege asyrǵanda 2-3 jylda salyp bitetin edik. Al odan keıin ony kútip ustaý máselesi aldymyzdan shyǵar edi", - dedi vıtse-mınıstr.
Rýslan Dálenov jergilikti deńgeıdegi jobalardyń biri retinde Almatyda júzege asyrylǵan qatty jáne turmystyq qaldyqtardy basqarýdyń keshendi júıesi jobasyn atady. Bul jobaǵa da bıýdjetten eshqandaı qarjy shyǵyndalmaıdy. Qazirgi ýaqytta qatty jáne turmystyq qaldyqtardy jınaý jáne tasymaldaý boıynsha suryptaý kesheniniń qurylysy júrgizilip jatyr.
