Memlekettik-jekemenshik seriktestikti júzege asyrý úshin arnaıy jol kartasy əzirlenedi (FOTO)

ASTANA. QazAqparat - 2016 jyldyń naýryzyna deıin Úkimettiń daǵdarysqa qarsy josparynyń aıasynda memlekettik-jekemenshik seriktestikti júzege asyrý úshin arnaıy " Jol kartasy" əzirlenedi. Bul týraly búgin elorda əkimdiginde ótken jıyn aıasynda QR Ulttyq ekonomıka vıtse-mınıstri Marat Qusaıynov məlim etti.

"Memlekettik-jekemenshik seriktestik týraly" jańa zań aıasynda birqatar normatıvtik-quqyqtyq aktiler qabyldandy, naqtyraq aıtsaq, QR Ulttyq ekonomıka mınıstrliginiń alty buıryǵy, 3 qaýlysy jəne QR Prezıdentiniń bir Jarlyǵy qabyldandy. Bul degenimiz, memlekettik-jekemenshik əriptestiktiń bar kerekti ədistemelik jəne zańnamalyq bazasy, birtutas ınstıtýtsıonaldy júıe qalyptasty degen sóz. Al, elimizde bul úderisti júzege asyrýǵa "Qazaqstannyń memlekettik-jekemenshik seriktestik ortalyǵy" AQ bekitildi", - dep habarlady M.Qusaıynov.
Vıtse-mınıstrdiń habarlaýynsha, bul ortalyq memlekettik-jekemenshik seriktestik salasynda úzdiksiz saraptama júrgizip, memlekettiń ınvestıtsııalyq jobalaryn baǵalaýy kerek.
"Al, Úkimettiń daǵdarysqa qarsy sharalary aıasynda memlekettik-jekemenshik seriktestikti damyta túsý úshin jylyna keminde 5 jobany júzege asyrý mindeti júkteletin ındıkator iske qosylady. Bul Úkimettiń tapsyrmasy, sondyqtan osy jyly ındıkatordy júzege asyrýymyz kerek. Sonymen qatar, barlyq sala men barlyq aýdanda memlekettik-jekemenshik seriktestikti júzege asyrý úshin arnaıy "Jol kartasy" əzirlenedi. Jol kartasy 2016 jyldyń naýryzyna deıin əzirlenýi kerek", - dep habarlady vıtse-mınıstr.
Esterińizge sala keteıik, "Memlekettik-jekemenshik seriktestik týraly" zańǵa QR Prezıdenti 2015 jyldyń 31 qazanynda qol qoıǵan.