Memlekettik-jekemenshik áriptestiktiń búkil rásimi onlaın formatqa aýystyrylady

NUR-SULTAN. QazAqparat – Qazaqstanda memleket – jekemenshik áriptestiginiń rásimderi tsıfrlandyryrylyp jatyr. Bul týraly QR Ulttyq ekonomıka mınıstri Álibek Qýantyrov Májilis depýttarynyń saýalyna joldaǵan jaýabynda aıtty, dep habarlaıdy QazAqparat tilshisi.

«Qazirgi tańda memleket-jekemenshik áriptestigi protsesterin tsıfrlandyrý, barlyq rásimderdi onlaın platformaǵa kezeń-kezeńimen kóshirý boıynsha jumys júrgizilýde, bul shekteýsiz tulǵalar toby úshin MJÁ 4 josparlaýdyń barlyq protsesteriniń tolyq qoljetimdiligin qamtamasyz etedi. Sonymen qatar, vedomstvoaralyq jobalyq toptyń quramyna ózin-ózi retteıtin uıymdardyń ókilderin, depýtattar men BAQ-ty engizý týraly usynysty mınıstrlik MJÁ týraly zańnamaǵa jańa túzetýler qalyptastyrý sheńberinde qaraıtyn bolady», - dep jazylǵan mınıstrdiń jaýabynda.

Onyń aıtýynsha, memleket-jekemenshik áriptestigi aıasyndaǵy jobalardy josparlaý kezeńinde áleýetti memlekettik áriptestiń jobany basqarý sapasyn qamtamasyz etý úshin vedomstvolyq baǵynysty uıymdardyń mamandaryn, táýelsiz sarapshylardy, jobalyq, ınjınırıngtik jáne basqa kompanııalardy, múddeli jáne ýákiletti memlekettik organdardy, «Atameken» ulttyq kásipkerlik palatasynyń ókilderin, kásipkerlik sýbektilerin tartý arqyly vedomstvoaralyq jobalyq top quratyny kózdelgen.

Ol vedomstvoaralyq toptyń quzyretine mynandaı fýnktsııalar berilmek:

- MJÁ jobasyn iske asyrý tetikteri boıynsha usynystar men bastamalardy zerdeleý;

- MJÁ jobasyn júzege asyrý tásilin, konkýrs túrin, jer ýchaskelerin bólýmen, ınjenerlik jelilerge qosylýmen baılanysty máselelerdi irikteıdi, baǵalaıdy, basymdyǵyn aıkyndaý;

- hattamaǵa qol qoıý arqyly MJÁ jobasyn iske asyrýdyń oryndylyǵy ne oryndylyǵynyń joqtyǵy týraly usynymdar qabyldaý;

- josparlanǵan MJÁ jobasy boıynsha marketıngtik jáne ózge de zertteýlerdiń nátıjelerin zerdeleý;

- barlyq qajetti esepteýlerdi, onyń ishinde MJÁ jobasynyń aldyn ala esepteýlerin zerdeleıdi; - konkýrstyq qujattamaǵa engizý úshin usynystar qalyptastyrý;

- MJÁ jobasyn josparlaý kezeńinen bastap MJÁ shartyn jasasý kezeńine deıin MJÁ jobasyn daıyndaýǵa tartylǵan adamdardyń esepterin tyńdaý;

- kelisýshi ýákiletti organdar men uıymdardan eskertýler alý shamasyna qaraı MJÁ jobasynyń konkýrstyq qujattamasyn kelisý jáne saraptaý protsesi barysynda pysyqtaýdy júzege asyrý;

- MJÁ konkýrstyq qujattamasyn qaraý, kelisý, saraptaý jáne bekitýden ótý merzimderi men rásimderiniń saqtalýyn qadaǵalaý.

Buǵan deıin Álibek Qýantyrov temekige salynatyn aktsız kezeń-kezeńimen kóteriletinin túsindirgen edi.