Memlekettik-jeke seriktestik protsedýralary jeńildetiledi
ASTANA. QazAqparat - Memlekettik-jeke seriktestik protsedýralary jeńildetiledi. Bul týraly búgin Úkimettiń kezekten tys otyrysynda Premer-Mınıstr Baqytjan Saǵyntaev aıtty, dep habarlaıdy QazAqparat.
«Memlekettik-jeke seriktestik máselesin de biz birneshe márte talqyladyq. Memleket basshysy taraynan memlekettik-jeke seriktestik mehanızmderiniń, ásirese, óńirlerde qoldanylý deńgeıiniń tómendigine qatysty ádil syn boldy. Ulttyq ekonomıka mınıstrligine 1 aılyq merzimde protsedýrany odan ary qaraı jeńildetý boıynsha jumystar júrgizýdi tapsyramyn. 1 toqsannyń sońyna deıin túrli saladaǵy úlgilik jobalar tizimin keńeıtý, bul máselede óńirlerge tolyqtaı ádistemelik qoldaý kórsetý kerek», - dedi Premer-Mınıstr.
Saǵyntaev Ulttyq ekonomıka mınıstrligine basqa da salalyq mınıstrliktermen birlese otyryp, ákimdikterdiń bıýdjettik ótinimderin qaraý barysynda memlekettik-jeke seriktestik aıasynda júzege asyrýǵa bolatyn jobalardy alyp tastaýy qajet ekendigin basa aıtty.
«Jaqynda respýblıkalyq bıýdjetti naqtylaý qajet bolady. Baqyt Turlyhanuly (Qarjy mınıstri) qazirgi kezeńnen bastap osy ustanymdy basshylyqqa alyp, tipti erterekte kelisilgen jobalardy da alyp tastaý kerek», - dedi Úkimet basshysy.
