Memlekettik-jeke menshik áriptestik salasynda ınvestıtsııa úshin jańa múmkindikter ashylady
ASTANA. 20 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik-jeke menshik áriptestiktiń jańa nysandaryn engizý jáne olardyń qoldaný salalaryn keńeıtý boıynsha ózgerister men tolyqtyrýlar engizý týraly» zań jobasyn eki oqylymda talqylap, qujatty qabyldady.
Atalǵan qujat Memleket basshysynyń byltyrǵy qańtardaǵy Joldaýyn iske asyrý, sondaı-aq memlekettik-jeke menshik áriptestikti damytý úshin jaǵdaı jasaý maqsatynda ázirlengen.
Zań qoldanystaǵy 8 zańnamalyq aktige memlekettik-jeke menshik áriptestiktiń jańa nysandaryn engizýge baılanysty ózgerister engizýdi qarastyrady. Budan bólek, qujat kelisimsharttyq memlekettik-jeke menshik áriptestiktiń jańa úlgilerin engizýdi, áleýmettik baǵyty bar ınvestıtsııalyq jobalar boıynsha jeke sektor úshin tartymdy jaǵdaılar jasaýdy kózdeıdi.
Atap aıtqanda, jeke menshik sektor úshin jańa ınvestıtsııalyq múmkindikter jasalyp, jekeshe kásipkerlik damytylady. Osy sharalardy zańnamada iske asyrý ınvestorlar úshin jańa ınvestıtsııalyq múmkindikter men jańa tabys kózderin ashady. Kapıtaldy qajet etetin uzaq merzimdi ınvestıtsııalar úshin tartymdy jaǵdaı jasaıtyn bolady.
Jalpy alǵanda zań memlekettik-jeke menshik áriptestik barysynda jobalardy iske asyrý úshin kapıtal tartýdyń múmkindigin qamtamasyz etetin quqyqtyq negiz jasaýǵa yqpal etedi. Munyń ózi Qazaqstan óńirlerine oń áleýmettik-ekonomıkalyq áserin tıgizedi.
Parlament qabyldaǵan zań Memleket basshysynyń qol qoıýyna joldanady.
