Memlekettik zańdy tulǵalarǵa ruqsat berilgen qyzmet túrleri 16 paıyzǵa qysqartylmaq
ASTANA. QazAqparat - Qazaqstanda memlekettik zańdy tulǵalar úshin ruqsat berilgen qyzmet túrleriniń sany 16 paıyzǵa qysqartylmaq. Bul týraly búgin Úkimettiń selektorlyq rejimdegi otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.
"Ekonomıkany odan ári jekeshelendirý jáne memleket ıeliginen alý boıynsha sharalar qabyldanady. Aǵymdaǵy jyly 139 nysandy satý josparlanyp otyr. Qazatomónerkásiptiń ІRO-ny tabysty ótkizý tájirıbesin eskere otyryp, Qazaqtelekom, Eır Astana jáne Samuryq-Energo kompanııalarynyń aktsııalaryn satý josparlanýda", - dedi mınıstr.
Onyń aıtýynsha, munan bólek 2019 jyly jekeshelendirý baǵdarlamasyna qosymsha 48 nysan qosylady.
"Osyǵan baılanysty, múddeli memlekettik organdarǵa osy jylǵy 1 naýryzǵa deıin osy nysandardy aǵymdaǵy jyly satý boıynsha jol kartalaryn ázirleýge tapsyrma berýińizdi suraımyn", - dedi Tımýr Súleımenov Premer-Mınıstrge qarata.
Sonymen qatar, Ekonomıkalyq yntymaqtastyq jáne damý uıymy elderiniń standarttaryna sáıkes memlekettik menshik qurylymyn kommertsııalyq jáne kommertsııalyq emes dep naqty zańnamalyq bólý arqyly ony reformalaý qaralatyn bolady. Monopolııaǵa qarsy retteýdi EYDU elderiniń standarttaryna sáıkes keltirý, sondaı-aq Yellow Pages qabyldanǵan qaǵıdattardy ustaný boıynsha jumys jalǵastyrylady.
"Mınıstrlik memlekettik zańdy tulǵalar úshin ruqsat berilgen qyzmet túrleriniń sanyn 16 paıyzǵa nemese 55 túrge qosymsha qysqartý týraly usynysty Úkimetke engizdi",- dedi ol.
