Memlekettik turǵyn úı alýǵa úmitker adamdardyń toby zań júzinde anyqtalady
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Zań jobasy boıynsha turǵyn úı qatynastary salasynda ákimshilik quqyq buzýshylyqtardyń jańa quramdary engiziledi. Memlekettik turǵyn úı alýǵa úmitker adamdardyń tobyn anyqtaı maqsatynda «bıýdjettik uıymdar» uǵymy engiziledi. Sonymen qatar, ýákiletti organdardyń turǵyn úıge qoıylatyn tehnıkalyq talaptary boıynsha quzyretin anyqtaý qarastyrylyp, kondomınıým nysanyn basqarý organdary qyzmetiniń ashyqtyǵyn qamtamasyz etý kózdeledi», - dedi Ulttyq ekonomıka mınıstri Erbolat Dosaev.
Onyń aıtýynsha, búgingi kúni bıýdjettik uıymdardyń qyzmetkerlerine jatqyzylatyn adamdar toby elimizdiń qandaı da bir zańnamalyq aktisinde anyqtalmaǵan. «Al baspanaǵa kezekte turǵandardyń tizimin jyl saıyn túgendeý kezinde jergilikti atqarýshy organdar bıýdjettik qyzmetker ekenin rastaıtyn qujattardy talap etedi. Bul óz kezeginde azamattardyń kórsetilgen sanatqa jatatynyn úsh kún ishinde rastaýǵa múmkindik bermeıdi. Sondyqtan da, «bıýdjettik uıymdar» uǵymy memlekettik turǵyn úı qorynyń baspanamen qamtylýǵa úmitker bolýǵa quqyly adamdar tobyn anyqtaý maqsatynda engizilip otyr», - deıdi E. Dosaev.
Toqtala ketetin jaıt, zań jobasynda kóp balaly otbasylardyń memlekettik turǵyn úı qorynan baspana alǵanǵa deıin olardyń kezegin saqtaý, Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵyn saqtaı otyryp, olardyń arasynda páterler bólý úshin eń kemi jıyrma paıyzdyq kvota bekitý týraly usynystar da qabyldanǵan.
