Memlekettik týdy qoǵamdyq oryndarda ilýge bola ma: Baıbektiń jaýaby

NUR-SULTAN. QazAqparat – «Nur Otan» partııasy Tóraǵasynyń birinshi orynbasary Baýyrjan Baıbek Memlekettik týdy nasıhattaý jóninde pikir bildirdi, dep habarlaıdy QazAqparat tilshisi.

«Halyqaralyq tájirıbeni qarastyrsaq, árbir eldiń óziniń ulttyq rámizderin keńinen paıdalanatynyn kóremiz. Mysaly, AQSh pen Túrkııada kósheler jalaýshalarmen bezendirilgen. Olar sham baǵanalary arasyna tartylyp, jeke aýlalarda, turǵyn úıler ishinde, qoǵamdyq oryndarda, týrıstik nysandarda ilingen. Al bizdiń qoǵamda ókinishke oraı, «Memlekettik týdy paıdalanýǵa jáne ilýge ruqsat joq» degen jalǵan stereotıp qalyptasqan. Jurtshylyqty osy stereotıpten aryltý úshin partııa «Meniń Týym, meniń Otanym!» patrıottyq aktsııasyn qolǵa aldy», - dedi Baýyrjan Baıbek Memlekettik rámizder men nagradalar geraldıkasy jónindegi respýblıkalyq komıssııa otyrysynda.

Bul aktsııa elimizdiń Týyn qoǵamdyq oryndarda, týrıstik nysandarda jáne marshrýttarda, saýda ortalyqtarynda, joǵary jáne arnaýly oqý oryndarynda jappaı ilýdi kózdeıdi.

Tóraǵa orynbasarynyń aıtýynsha, «Nur Otan» partııasynyń qoldaýymen 10 qazanda Almaty qalasynda Medeý sport kesheni aýmaǵynda bıiktigi 40 metr bolatyn týtuǵyr ornatylyp, baıraq kóterildi. Atyraý men Qostanaıdan basqa, barlyq oblys ortalyqtarynda bıik tuǵyrda Memlekettik tý ilinip tur.

Komıssııa tóraǵasy – Memlekettik hatshy Qyrymbek Kósherbaev atalǵan patrıottyq aktsııaǵa jan-jaqty qoldaý kórsetýdi tapsyrdy.

«Ýákiletti organdarda, aýdandyq jáne qalalyq ákimdikterde, shalǵaıdaǵy aýyldyq okrýgterde memlekettik rámizderdi qoldaný jáne nasıhattaý salasyndaǵy jumysyna baqylaý kúsheıtilsin», - dep tapsyrma berdi Memlekettik hatshy.

Aıta keteıik, QR «Memlekettik rámizderi týraly» zańynyń 13-babynda «Qazaqstan Respýblıkasynyń memlekettik rámizderine qurmetpen qaraýdy qalyptastyrý» týraly aıtylǵan.

Eske sala ketsek, búgin Aqordada Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jóninde respýblıkalyq komıssııa otyrysy ótti. Otyrysta QR Mádenıet jáne sport mınıstri Aqtoty Raıymqulova Memlekettik rámizderdiń ımportyna tyıym salýdy usyndy.

Sonymen birge, memlekettik organdardyń vedomstvolyq nagradalarynyń dárejeleri alynyp tastalyp, uqsas nagradalar biriktiriledi.