Memlekettik Týdy balkondarǵa ilýge ruqsat etilmek

ASTANA. QazAqparat – Týrızm jáne sport mınıstrligi Memlekettik Týdy paıdalaný erejelerine ózgeris engizbek. Ashyq talqyǵa shyǵarylǵan Úkimet qaýlysyna saı, endi Týdy balkondarǵa ilýge ruqsat etiledi, dep habarlaıdy QazAqparat tilshisi.

«Jeke tulǵalarǵa tıesili ǵımarattarda, úı-jaılarda (úı-jaılardyń bóliginde, balkondarda) Memlekettik Tý kólbeý túrde (45 gradýstan aspaıtyn bolýy tıis), 3 metrden tómen emes bıiktikte ornalastyrýǵa ruqsat etiledi. Memlekettik Tý 1h2 metr ólshemde bolýy tıis», - delingen Ashyq NQA portalynda jarııalanǵan Úkimet qaýlysynyń jobasynda.

Aıta keteıik, qoldanystaǵy zańnama talabynda mundaı norma joq. Sonymen qatar qaýlyǵa taǵy birneshe ózgeris engizilmek. Atap aıtqanda, endi Memlekettik Týdyń beınesi áskerı nemese ózge de memlekettik qyzmet atqaratyn adamdar úshin belgilengen aıyrym belgileri men nysandy kıim úlgilerinde, memlekettik nagradalardyń elementi, geraldıkalyq negizi retinde, sondaı-aq sportshylardyń sporttyq kostıýmderi men basqa da sporttyq kerek-jaraqtaryna paıdalanýy múmkin. Degenmen bul rette mynaǵan tyıym salynady:

- QR Memlekettik Týyn qoǵamdyq birlestikter men basqa da uıymdar jalaýlary, mórleri jáne tańbalarynyń geraldıkalyq negizi retinde paıdalanýǵa bolmaıdy.

Buǵan qosa qaýlynyń jańa tarmaǵyna sáıkes, myna áreketter Týdy qorlaý bolyp sanalady:

- jyrtý, jaǵý, órteý, qasaqana jerge tastaý, taptaý, qoqysqa laqtyrý;

- kollaj jasaý arqyly memlekettik týdy qorlaý, tyıym salynǵan jáne maqsatqa saı emes jerlerde paıdalaný, áleýmettik jelilerdi qosa alǵanda Memlekettik Týdy kópshilik aldynda mazaq etý, balaǵattaý.

Qaýly27 qyrkúıekke deıin kópshilik talqylaýda bolady.