Memlekettik tilge qatysty ózgeriske qoǵam tolyǵymen daıyn - senator
NUR-SULTAN. QazAqparat – Senator Murat Baqtııaruly memlekettik tildiń mártebesin tek zańdy ózgertý jolymen ǵana kóterýge bolatynyn málim etti, dep habarlaıdy QazAqparat tilshisi.
Byltyr jeltoqsan aıynda Murat Baqtııaruly bastaǵan bir top senator memlekettik til – qazaq tiliniń máselesin kóterip, Úkimet basshysyna saýal joldaǵan bolatyn. Depýtattar jańadan memlekettik til týraly zań qabyldaý kerektigin kótergen edi.
«Memlekettik til máselelesine qatysty Úkimetten jaýap boldy ma?» - «ANTIKOR ORTALYǴY» alańyndaǵy «AANTIKOR.LIVE» jobasy aıasynda Parlament Senatynyń depýtaty, Áleýmettik-mádenı damý jáne ǵylym komıtetiniń tóraǵasy Murat Baqtııarulyna osy suraq qoıyldy.
«Depýtattyq saýalǵa jaýap berildi. Jaýap boıynsha 2025 jylǵa deıingi memlekettik til baǵdarlamasy qabyldanyp, sol kezeńde zańdy ózgertemiz deıdi... Qazir memlekettik tilge baılanysty hatqa qoǵamda qol jınaý bastaldy. 200 myńǵa jýyq adam qol qoıǵann. Sondyqtan bul máseleni órkenıetti jolmen sheshýimiz kerek. Buǵan arnaıy komıssııa qurmaı-aq, Konstıtýtsııanyń 7-shi babyndaǵy resmı tilge baılanysty máseleni qaraýymyz kerek», - dedi senator.
Murat Baqtııarulynyń aıtýyna qaraǵanda, elimizde orys nemese ózbek tildiler gazet, teatr, aqparat quraldarynyń jumysyn jalǵastyra bere alady.
«Jasyrmaımyz. Bul - órkenıetti elderdiń bárinde bar. Memlekettik tildiń máselesi tek zańdy ózgertý jolymen ǵana sheshiledi. Menińshe, qoǵam, memleket oǵan qazir daıyn. Mysaly ońtústik pen batys óńirlerdiń (úsh-tórt oblystan basqanyń báriniń) is-qaǵazdary, jınalystary memlekettik tilde júrgiziledi. Almaty oblysynan bastap Batys Qazaqstan, Qyzylorda, Túrkistan, Shymkent, Jambyl – bári de memlekettik tilge kóship ketti», - dedi senator.
