Memlekettik tildi úıretýge baǵyttalǵan qarjy qaıda jumsalýda: depýtat saýal joldady

NUR-SULTAN. QazAqparat – Búgin Májilistiń jalpy otyrysynda depýtat Erlan Saıyrov QR Premer-Mınıstriniń orynbasary Eraly Toǵjanovqa qazaq tilin úırenýge qatysty saýal joldady, dep habarlaıdy QazAqparat tilshisi.

«Qazirgi óte kúrdeli geosaıası jaǵdaı elimizdiń ishki saıasatynyń kóptegen aspektilerin qaıta qaraýdy talap etedi. Osynaý tereń máseleniń biri - til saıasaty, onyń ishinde memlekettik tildi úırený problematıkasy. Memlekettik tildi úıretý, oǵan baýlý yjdahatty túrde bola otyryp, ózara syılastyq, baýyrlastyqqa ákelýi qajet. Memlekettik til qoǵamnyń yntymaǵynyń, birliginiń sımvolyna aınalýy, osy turǵyda, memlekettik tildi úıretýdiń baǵdarlamalarynyń tıimdiligi, til úırenýshilerge naqty kómek jasaýǵa qabilettiligi turǵysynan aýdıt júrgizý óte mańyzdy», - dedi Májilis depýtaty.

Onyń atap ótýinshe, «AMANAT» partııasy saılaýaldy baǵdarlamasynda memlekettik tildi damytýǵa basa nazar aýdarylǵan.

Sondyqtan, Memlekettik tildi úıretýge baǵyttalǵan qarjy qaıda, qalaı jumsalyp jatyr? Memlekettik tildi úıretýge baǵyttalǵan oqý-úıretý baǵdarlamalarynyń tıimdiligi jóninde qansha adam úırenip shyqty, qansha adam tildik birinshi, ekinshi satyǵa ótkendigi jóninde saraptama jasaý qajet. Erikti azamattardyń qazaq tilin úırenemin deýshilerge ádistemelik tásil jaǵynan kómektesýge qabiletti baǵdarlamalaryn memlekettik organdar qanshalyqty tıimdi qoldanýda? Osy máseleler boıynsha Úkimettiń quzyrly organdarynyń qoǵam aldynda esep berýin suraımyz», - dedi ol.

Depýtat memlekettik tildi damytýdyń arǵy jaǵynda el men jer máselesi turǵanyna basa nazar aýdardy.

«Memleket myǵym bolýy úshin ana tilimiz asqaqtaýy mańyzdy. Qazaq tili qoǵamnyń yntymaq, birliginiń ýyǵy, eldiń konsolıdatsııanyń tiregi bolýy tıis. Osy másele boıynsha sheshim qabyldap, qaraý nátıjelerin zańda kórsetilgen merzimde habarlaýdy suraımyz», - dedi Erlan Saıyrov.