Memlekettik tildi úıretýdegi zamanaýı ádistemelik ónimder tanystyryldy

NUR-SULTAN. QazAqparat – «Memlekettik tildi úıretýdegi zamanaýı ádistemelik ónimder» taqyrybynda respýblıkalyq onlaın semınar ótti, dep habarlaıdy QazAqparat.

Shara QR Bilim jáne ǵylym mınıstrligi Til saıasaty komıteti Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń uıymdastyrýymen oblystardaǵy tilderdi oqytý ortalyqtarynyń til úıretýdegi sheteldik jáne otandyq ınnovatsııalyq tehnologııalarǵa negizdelgen júıesi boıynsha til oqytýda ázirlegen ádistemelik ónimderin nasıhattaý maqsatynda ótkizildi.

Semınarda oblystardaǵy tilderdi oqytý ortalyqtarynyń oqý-ádistemelik resýrstarymen (oqý baǵdarlamalary, oqý quraldary, oqý ádistemesi, ınnovatsııalyq ónim, onyń ishinde tsıfrlyq oqytý boıynsha) tanystyrý arqyly ózara tájirıbe almasý, oqytýdy birizdendirý joldaryn qarastyrý, ortalyqtyń oqytýshy-ádiskerleriniń shyǵarmashylyq izdenisterin ortaǵa salý jáne memlekettik tildi oqytý boıynsha ozyq ıdeıalar usyný jáne ІT salasynyń dınamıkalyq ózgerisine ilese alatyn pedagogtiń aqparattyq-kommýnıkatsııalyq quzyrettilikterin qalyptastyrý máselesi qozǵaldy.

Semınarǵa QR Bilim jáne ǵylym mınıstrliginiń Til saıasaty komıtetiniń Ádistemelik qamtamasyz etý basqarmasynyń basshysy Aınagúl Kókenova qatysty.

Semınardy Qaraǵandy oblystyq tilderdi oqytý ortalyǵy bastady. Ásirese, QR-kod zamanaýı dıktanttar men mazmundamalar jınaǵy kóshiliktiń kóńilin aýdardy. Jınaqta (baqylaý, sózdik, sýretti, túsindirmeli, kórý t,b) túrlerimen qatar zamanaýı dıktant túrleri (beıne dıktant, grafıkalyq, shyǵarmashylyq, súıený, júgirý, ysqyrý t.b) men mazmundamalar jınaǵy taratpa materıaldarymen, dybystalýymen berilgen.

Sonymen qatar til úırenýshilerge arnalǵan kespe kartochkalarynyń ereksheligi – taqyryptyq, jaǵdaıattyq sózdikter, daıyn sóz oramdary sýret túrinde QR-kod arqyly onlaın bazasynda jáne YouTube kanalynda ornalastyrylǵan.

Qaraǵandy oblysynyń tilderdi oqytý ortalyǵynyń YouTube kanalynda qazaq tilin úırenýge arnalǵan 24 saǵattyq sabaq, aǵylshyn tilin qazaq tilinde úırenýge arnalǵan sabaqtar toptamasy, 34 serııaly qysqametrajdy jaǵdaıattyq beınerolıkter eki tilde sýbtıtrymen, leksıkalyq mınımým men daıyn sóz oramdaryn bekitýge arnalǵan podkasttar ázirlengen.

Barlyq óńirdegi til úıretý ortalyqtary talapqa saı júıeli jumys júrgizip jatqanyn kórsetti.

Sharany Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń bas dırektorynyń orynbasary Lıza Esbosynova qorytyndylady.